17 январь куни «Док-1 Макс» фожиаси бўйича давом этаётган суд ишининг навбатдаги мажлиси бўлиб ўтди. Унда жабрланувчиларнинг қонуний вакиллари ўз кўрсатмаларини бериб ўтишди.
Суд аввалида видеоконференция орқали жабрланувчиларнинг кўрсатмалари тингланди. Ундан сўнг суд залига ташриф буюрган жабрланувчилар ўз шикоятларини билдириб ўтишди. Жумладан, ушбу сиропни ичиш орқали ногирон бўлиб қолган 5 ёшли Алижонов Нодирбекнинг отаси Абдуллаев Анвар кўрсатма берди. Унинг сўзларига кўра, фарзанди ҳозир ҳеч нарсани англамайди, гапирмайди, фақат битта жойда ётади.
«Ота-онам мендан ҳам кўпроқ сиқилишди, стрессга тушиб, дадам 2 марта инсульт бўлди. Тошкентда турдим, 5 ой шифохонадан чиқармадик… Ҳақиқатдан вилоят билан Тошкентни даволашда, мутахассисларида фарқи бор. Мажбур бўлдик мутахассис шифокорларнинг олдидан кетмасдан қараб ўтирдик… Хотинимнинг ҳам боши карахт, яхшилаб текширтирсак унинг ҳам мусибат ортидан орттирган касалликлари келиб чиқади… Боламизни нархлагани келмаймиз бу ерга. Алам қилиб, ёнганидан келяпмиз… Давлат ҳуқуқларидан, тергов натижасида олиб келиб қўйибсизлар, балки булар ичида айби йўғи ҳам бордир, аввало, худо билади. Бундан катталари ҳам тепада ўтиргандир, балки… Агар айбдор, деб топсаларинг ўта оғир жазога тортишингизни сўрайман. Ҳамма шу ерда иш кўраётганлар, кимлардир кимнидир оқлаётганлар, илтимос қиламан, бизни фарзандимизни ҳам ўз боласини ўрнига қўйиб кўрсин…», деб қўшимча қилган боласи ногирон бўлиб қолган ота. Абдуллаев Анвар фарзандини тўлиқ даволатиш учун 5 млрд сўм компенсация сўраган.
Кейинги суд иши 19 январь куни давом этади.
Сардорбек Поёнов, Улуғбек Тўхтаев, ЎзА.