“Бизга Европа армияси керак ва бу самарали Европа ташқи сиёсатининг асосий шартидир”, – деди Италия ташқи ишлар вазири Антонио Таяни Италиянинг “La Stampa” газетасига берган интервьюсида.

Италия бош вазири ўринбосари ва ташқи ишлар вазири Антонио Таяни ЕИ тинчликни сақлаш ва можароларнинг олдини олишда роль ўйнашга қодир армияга эга бўлиши кераклигини айтган.

Унинг таъкидлашича, АҚШ, Хитой, Ҳиндистон ва Россия каби кучли “ўйинчилар” мавжуд бўлган дунёда ЕИ ўз армиясига эга бўлиши керак: “Агар биз дунёда тинчликпарвар куч бўлишни истасак, бизга Европа армияси керак ва бу Европа ташқи сиёсатининг самарали асосий шартидир”.

Бу армия европаликларнинг хавфсизлиги учун зарур эканлигини таъкидлаган вазир “ЕИ фуқароларини фақат ЕИ ҳимоя қилиши мумкин”, – деб қўшимча қилган.

Вазир, шунингдек, Европа Кенгашининг амалдаги президенти ва Еврокомиссия раиси ўрнига ягона раисликни жорий этиш орқали ЕИнинг етакчилик тизимини ижобий томонга ўзгартириш мумкинлигини айтган.

Кўп ўтмай, Антонио Таянининг ЕИда ягона армия яратиш чақириғига Россия Ташқи ишлар вазирлиги расмий вакили Мария Захарова ўзининг телеграм каналида жавоб берди.

“Брюссель аллақачон COVID-19 ва миграция инқирози каби глобал муаммоларга дош бера олмаслигини кўрсатди. ЕИ аввало ушбу муаммоларни ҳал қилиши керак, шундан кейингина армия яратиш ҳақида ўйласа бўларди” – деб ёзади Захарова.

Унинг сўзларига кўра, бирлашган Европа қуролли кучлари қатор муаммолар туфайли ишлай олмайди. Улардан бири сифатида у ЕИнинг энергия нархларига боғлиқлигини таъкидлади.