Мамлакатда илғор хорижий тажриба, жаҳон фанининг замонавий ютуқлари, инновацион ғоялар, ишланмалар ва технологиялар асосида иқтисодиётнинг барча тармоқлари ва ижтимоий соҳани жадал инновацион ривожлантиришни таъминлаш мақсадида Олий таълим, фан ва инновациялар вазирлиги ҳузурида Инновацион ривожланиш агентлиги ташкил этилган эди.

Инновацион ривожланиш агентлиги ахборот хизмати раҳбари Ҳожиакбар Каримовнинг маълум қилишича, бугунги кунда вазирлик ва идоралар тасарруфидаги 200 дан зиёд илмий ва таълим ташкилотида илмий даражали кадрлар тайёрланмоқда. Ўтган 2023 йилда кейинги йил учун стажёр-тадқиқотчиликка, таянч докторантурага, докторантура ва мақсадли докторантурага жами 5 минг 200 та ўринга қабул квотаси ажратилган. 2024 йил учун тақсимланган квота доирасида ўтказилган танлов натижаларига кўра, 4  минг 200 та (81 фоиз) квота ўзлаштирилган.

Республикада креатив иқтисодиётни шакллантиришда янги иш ўрни яратишдан бошлаб иқтисодий қиймат (капитал) яратишгача бўлган “тармоқ-ҳудуд-илмий/олий таълим ташкилот” узлуксиз экотизимини ривожлантириш мақсадида бир неча йўналишлар белгилаб берилган. Хусусан, инновацион инфратузилма субъектлари тармоғини шакллантириш орқали стартап ташаббусларни қўллаб-қувватлаш ҳамда йирик ҳажмли ишлаб чиқаришни (капитал яратиш) ташкил этиш бўйича ўтган 2023 йилда жами 46 та инновацион фаолият инфратузилмаси субъектлари ташкил этилган.

Жумладан, 11 та Технологик парклар, 4 та Технологиялар трансфери марказлари, 4 та Инновацион кластерлар, 16 та Инновация марказлари, 11 та бизнес инкубаторлар ва акселератор фаолияти йўлга қўйилган.

Кичик тадбиркорликнинг инновацион фаоллигини ошириш орқали инновацион ҳудудларнинг ижтимоий-иқтисодий жадал ўсишини таъминлаш йўналиши бўйича ҳар бир туманнинг инновацион ривожлантириш Концепцияси ҳамда Чора-тадбирлар режаси ишлаб чиқилди ва тасдиқланди.

2023 йилда инновацион туманларда 28,9 миллиард сўм қийматга эга 28 та лойиҳа шакллантирилган бўлиб 6,6 миллиард сўм бўлган 9 та стартап ва  22,3 миллиард сўм бўлган 19 та тижоратлаштириш лойиҳаси молиялаштирилган. Бундан ташқари маҳаллий бюджет маблағлари ҳисобидан 11,9 миллиард сўм миқдорида илм-фанга йўналтирилган.

Ёшлар технопаркларида 10 минг 298 нафар ёш қамраб олинган. Ташкил этилган дастурлар доирасида ҳудудлардаги ёшлар томонидан 280 та стартап лойиҳаси шакллантирилишига кўмаклашилиб, 133,3 фоиз ўсиш таъминланган.

Тармоқ корхоналарида инновацион экотизимни ривожлантириш йўналиши бўйича иқтисодиёт тармоқлари томонидан жами 441 та лойиҳадан 378 та лойиҳани амалга ошириш ишлари бошланган. Бунда 3,9 триллион сўм ўзлаштирилган ва 25 та тармоқда жами 209 та лойиҳа бўйича ишлар тўлиқ якунланган.

Инновацион ривожланиш агентлиги томонидан 2023 йил давомида жами 9 та стартап лойиҳаси танлови эълон қилинган. Умумий танловларга жами 817 та таклиф лойиҳа келиб тушган. Танловлар натижасига кўра жами 43,7 миллиард сўмлик 54 та стартап лойиҳа молиялаштиришга тавсия этилган.

Муҳайё Тошқораева, ЎзА