Хитой Халқ Республикасининг “Синьхуа” ахборот агентлигининг хитой тилидаги “Катта беш” (big5.news.cn) янгиликлар нашри “Хитой корхонаси томонидан Марказий Осиёдаги энг йирик 400 МВт қувватга эга фотоэлектр лойиҳанинг биринчи босқичи электр энергияси ишлаб чиқариш учун тармоққа уланди” номли мақолани эълон қилди.
Мақолада Президентимиз Шавкат Мирзиёев бошчилигида 27 декабрь куни Ўзбекистоннинг олтита ҳудудида 5 та қуёш, 1 та шамол электр станцияларини ишга тушириш ва тармоққа улашга бағишланган тантанали маросим бўлиб ўтгани тилга олинган.
Тадбирда “China Energy Engineering Corporation” компанияси вице-президенти Ву Юнь, “China Energy International Group” компанияси бошқаруви раиси Лю Цзэсян, “China Gezhouba Group” компанияси бошқаруви раиси Линь Сяодань, “SEPCO III”, “Dongfang Electric Corporation” ва бошқа компаниялар раҳбарлари иштирок этгани тилга олиниб, Ўзбекистонда энергетика тизимини ислоҳ қилиш ва барқарорлигини ошириш бўйича кенг кўламли дастур амалга оширилаётгани эътироф этилган.
Кейинги йилларда тармоқда хусусий сектор ва етакчи хорижий компаниялар фаолиятига қулай шароитлар яратилгани, улар иштирокида Ўзбекистонда қайта тикланувчи энергетика салоҳиятини кенгайтиришга қаратилган кўплаб лойиҳалар муваффақиятли амалга оширилаётгани таъкидланган.
Дунёдаги саксондан ортиқ давлатлардаги катта-кичик лойиҳаларда фаол иштирок этадиган Хитойнинг нуфузли “China Gezhouba Group” компанияси Бухоро ва Қашқадарёда ҳар бирининг умумий қуввати 1000 мегаваттлик қуёш станцияларининг биринчи босқич қурилиши якунлангани урғуланган.
Муҳаррама Пирматова, ЎзА