Маълумки, мамлакатимизда саноат тармоқларининг салоҳияти, ишлаб чиқариш имкониятларини ривожлантиришга алоҳида эътибор қаратилмоқда. Шу ўринда Ўзбекистоннинг ташқи савдо айланмасида тайёр маҳсулотларнинг экспортдаги улуши ошиб бормоқда. Бунда, айниқса, саноат маҳсулотларининг ҳажми кўпаймоқда.
Сўнгги йилларда юртимиз саноат салоҳиятининг юксалишида ишлаб чиқариш корхоналари ташқи бозорларга эътибор қаратган ҳолда ўз харидорларига эга бўлаётгани, бу борада ривожланган давлатларнинг етакчи савдо-саноат доиралари билан ҳамкорлик алоқаларини йўлга қўйиш ҳамда илғор ишлаб чиқариш технологияларини ўзимизда жадал жорий этишга эътибор қаратаётганларини алоҳида таъкидлаб ўтиш жоиздир.
Бунда Германиянинг Халқаро ҳамкорлик жамияти (GIZ) билан ҳамкорликда 2007 йилдан буён республикамизда амалга оширилаётган “Менежерлар малакасини ошириш” дастури янги авлод менежерлари, замонавий фикрлайдиган ҳамда илғор бошқарув услуб ва технологияларини татбиқ этиш салоҳиятига эга раҳбарларнинг билим ва амалий кўникмаларини шакллантиришда ижобий тажрибани намоён қилмоқда.
Шу муносабат билан 2023 йил 12 сентябрь куни Вазирлар Маҳкамаси ҳузуридаги Бизнес ва тадбиркорлик олий мактабида республикамиз ҳудудларида фаолият юритаётган ишлаб чиқариш корхоналарининг 30 нафар раҳбар ва менежерлари учун Германиядан келган экспертлар иштирокида замонавий фикрлайдиган ва Европанинг саноат корхоналарини бошқариш соҳасидаги тажрибаларни ўрганишга қаратилган амалий семинар ўз ишини бошлади.
Мазкур семинар икки кун давом этади. Унда маҳаллий ишлаб чиқаришда илғор бошқарув услубларини жорий этиш, ташқи бозорларга кириб бориш ва унда ўз ўрнига эга бўлиши, Германиянинг саноатни бошқариш модели, ишлаб чиқаришга ресурс тежамкор технологияларни жорий этиш, ишлаб чиқариш самарадорлигини оширишда янги технологиялардан фойдаланиш ҳамда замонавий бошқарув услубларини қўллаш каби мавзуларда экспертлар томонидан тақдимотлар ўтказилади.
Шунингдек, семинарда маҳаллий менежерлар германиялик мутахассислар билан биргаликда “ақлий ҳужум” усулида ишлаб чиқаришни жаҳон талаблари даражасига олиб чиқиш юзасидан саноат корхоналари учун аниқ таклифларни шакллантирадилар.
Мазкур семинар 2023 йил ноябрь ойида маҳаллий менежерларнинг саноат корхоналарини бошқаришда Германия тажрибасини ўрганиш, Европа корхоналари билан кооперация алоқаларини ўрнатиш ҳамда жаҳондаги илғор бошқарув билимларини эгаллаш бўйича Германияда бўлиб ўтадиган стажировка олди тайёргарлик вазифасини ўтаб беради.
Ш.Маматуропова, ЎзА