Ózbekstan Respublikası Prezidentiniń qararı

Ózbekstan Respublikası Prezidentiniń 2025-jıl 3-yanvardaǵı “2025-jılda respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha ilajlar haqqında”ǵı PQ-1-sanlı qararınıń orınlanıwı nátiyjesinde máhállelerde jınayatshılıqtı derlik 1,5 esege azaytıwǵa erisilgenin esapqa alıp, sonday-aq, bul baǵdarda bir tutas jumıs sistemasın engiziw hám juwapker basshılardıń wazıypaların belgilew maqsetinde qarar etemen:
I. Maqsetler hám tiykarǵi wazıypalar
1.Tómendegiler usı qarardıń tiykarǵı maqsetleri etip belgilensin:
a) sociallıq profilaktika nátiyjeliligin arttırıwdı tiykarǵı wazıypa etip belgilegen halda máhállelerde qáwipsiz ortalıqtı isenimli támiyinlew boyınsha mánzilli profilaktikalıq ilajlar sistemasın nátiyjeli engiziw arqalı jınayatshılıqtı keskin azaytıw;
b) shańaraq-turmıs qatnasıqları sheńberinde jáne hayal-qızlar hám jaslar tárepinen islenip atırǵan jınayatlardıń tiykarǵı faktorların ilimiy kózqaraslar tiykarında tallaw arqalı olardıń erte aldın alıw boyınsha jańa jumıs mexanizmlerin belgilew;
v) hár qanday nızamsız jaǵdaylar boyınsha múrájatlarǵa operativ múnásibet bildiriw sistemasın jaratıw, bul baǵdardaǵı jumıstı tikkeley orınlarda nátiyjeli jolǵa qoyıw arqalı xalıqtıń razılıǵına erisiw.
2.Tómendegiler barlıq juwapker uyımlar hám mákemeler ushın máhállelerde qáwipsiz ortalıqtı jaratıw boyınsha shólkemlestiriwshilik-profilaktikalıq ilajlardı ámelge asırıwdıń tiykarǵı wazıypaları etip belgilensin:
a) Ózbekstan Respublikası Prezidentiniń 2025-jıl 3-yanvardaǵı “2025-jılda respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin jáne de arttırıw boyınsha ilajlar haqqında”ǵı PQ-1-sanlı qararı menen belgilengen mexanizmlerine muwapıq jumıslardı dawam ettiriw;
b) hár bir máhállede kriminogen jaǵdayǵa unamsız tásir etiwshi faktorlar menen islesiwdiń máhálleler kesiminde hár shereklik mánzilli ilajların belgilew jáne olardıń máhálle – rayon – wálayat dárejesinde orınlanıwı ushın tikkeley juwapker basshılardı biriktiriw hám olarǵa anıq juwapkershilikti júklew;
v) máhálle aymaǵında xalıqtıń sociallıq-turmıslıq mashqalaların sheshiw arqalı aldın alıw múmkin bolǵan hár bir jınayat boyınsha jergilikli hákimliklerdiń juwapkershiligin arttırıw, sociallıq profilaktika subektleri tárepinen ámelge asırılǵan ilajlardıń nátiyjeliligi boyınsha qatań soraw sistemasın jolǵa qoyıw;
g) shańaraq-turmıs qatnasıqları sheńberinde jáne hayal-qızlar hám jaslar tárepinen islenetuǵın jınayatlardı “ilimiy juwmaq – usınıs – nátiyje” principi tiykarında orınlarǵa shıqqan halda maqsetli ilimiy-ámeliy úyreniw arqalı nátiyjeli shólkemlestiriwshilik-huqıqıy ilajlardı belgilew;
d) máhállelerdegi jámiyetlik orınlarda huqıqbuzarlıqlardıń erte aldın alıw baǵdarına zamanagóy málimleme-kommunikaciya hám jasalma intellekt texnologiyaların, sociallıq profilaktikaǵa juwapker uyımlar hám mákemeler tárepinen kórilip atırǵan ilajlardıń nátiyjeliligi ústinen elektron qadaǵalaw sistemasın keńnen engiziw.
II. Shólkemlestiriw-profilaktikalıq ilajlar
3. Máhállelerde jınayatshılıqtıń erte aldın alıw boyınsha nátiyjeli sistemanı jolǵa qoyıwǵa qaratılǵan mánzilli jumıslardı shólkemlestiriw maqsetinde 2026-jılı aymaqlardıń juwapker basshıları hám mákemelerge tómendegi tártipte atpa-at biriktiriletuǵını belgilep qoyılsın:
a) kriminogen jaǵdayı awır máhálleler – rayon (qala) hákimleri, prokurorları hám ishki isler uyımları baslıqları hám olardıń orınbasarlarına;
b) bes jıldan berli “qızıl” kategoriyada qalıp atırǵan máhálleler – Milliy gvardiyanıń aymaqlıq basqarmaları baslıqlarına, wálayat dárejesindegi ishki isler uyımları basshılarınıń hám hákimlerdiń orınbasarlarına;
v) úsh jıldan berli “qızıl” kategoriyada qalıp atırǵan máhálleler – huqıq qorǵaw uyımlarınıń bilimlendiriw hám ilimiy shólkemlerine;
g) kriminogen jaǵdayı eń awır rayon hám qalalar – wálayatlar dárejesindegi prokurorlardıń hám ishki isler uyımları basshılarınıń birinshi orınbasarlarına;
d) hayal-qızlar jınayatshılıǵı, spirtli ishimlik hám náshebentlikke berilgen shaxslar jınayatshılıǵı hám de jánjelli shańaraqlar kórsetkishi eń joqarı bolǵan máhálleler – tiyisli túrde wálayatlar dárejesindegi shańaraq hám hayal-qızlar, densawlıqtı saqlaw hám de ádillik basqarmaları baslıqlarına.
4. Sonday tártip ornatılsın, oǵan muwapıq:
a) biriktirilgen juwapker basshılar hám mákemelerge óz aymaqlarında huqıqbuzarlıqlardıń erte profilaktikasın shólkemlestiriw úlgisin jaratıw, aymaqlıq “jol kartaları” menen belgilengen ilajlardıń tolıq ámelge asırılıwın támiyinlew jáne sociallıq profilaktika sistemasın nátiyjeli jolǵa qoyıw boyınsha qatań jeke juwapkerlik júklenedi;
b) Qaraqalpaqstan Respublikası Ministrler Keńesiniń Baslıǵı, wálayatlar hám Tashkent qalası, rayon (qala) hákimleri hár ayda tikkeley ózleri keminde eki kriminogen jaǵdayı awır hám qıyın máhállelerge barǵan halda jaslar, hayal-qızlar hám jumıssızlarǵa belgilengen sociallıq profilaktika ilajlarınıń ámelge asırılıw jaǵdayın sın kózqarastan úyrenedi jáne olardıń sociallıq-turmıslıq mashqalaların saplastırıw boyınsha mánzilli ilajlar kóredi;
v) hár aydıń juwmaǵında Qaraqalpaqstan Respublikası Ministrler Keńesi Baslıǵı, wálayatlar hám Tashkent qalası hákimleri tárepinen máhállelerde islengen sociallıq-turmıslıq túrdegi jınayatlardıń sebepleri hám olardı keltirip shıǵarǵan faktorlardı sın kózqarastan talqılaydı hám háreketsizlikke jol qoyǵan sociallıq profilaktikaǵa juwapker shólkemlerdiń basshılarına sharalar kóredi;
g) sociallıq beyimlestiriw baǵdarlaması juwmaqlanǵannan soń sociallıq profilaktika obektleri tárepinen jınayatlar isleniwiniń aldın alıw maqsetinde usı shaxslardıń turmıs tárizi bir jıl dawamında monitoring etilip barıladı.
d) respublika máhállelerinde qosımshaǵa muwapıq tártipte jergilikli hákimlikler basshılıǵında “Sociallıq profilaktika hápteligi”n ótkeriw ámeliyatı jolǵa qoyıladı;
j) Qaraqalpaqstan Respublikası Ministrler Keńesiniń Baslıǵı, wálayatlar hám Tashkent qalası, rayon (qala) hákimleri tárepinen aymaqlıq prokurorlar hám ishki isler uyımları basshılarınıń hár sherekte kirgiziletuǵın qospa usınıslarına tiykarlanıp máhállede jınayatshılıqtı saplastırıw baǵdarında juwapker mámleketlik uyımlardıń keminde 15 órnek kórsetken basshı hám xızmetkerleri jergilikli byudjet dáramatlarınıń prognozdan arttırıp orınlanǵan bólegi esabınan miynetke haqı tólew fondı (pul támiynatı) nıń bir esesi muǵdarında aqshalay sıylıq penen xoshametlep barıladı.
III. Shólkemlestiriw-qadaǵalaw ilajları

Máhállelerde huqıqbuzarlıqlardıń erte profilaktikası baǵdarındaǵı jumıslardı kompleksli shólkemlestiriw maqsetinde Bas prokuratura janında dúzilgen Respublikalıq uyımlararalıq muwapıqlastırıw jumısshı toparı (keyingi orınlarda – Muwapıqlastırıw jumısshı toparı) óz jumısın belgilengen tártipte dawam ettirsin.
Muwapıqlastırıw jumısshı toparı (B.Valiev, A.Raxmatullaev):
a) 2026-2027-jıllarda hár sherekte respublika máhállelerinde qáwipsiz ortalıq jaratıw hám huqıqbuzarlıqlardıń erte aldın alıwdıń nátiyjeli shólkemlestiriwshilik-texnikalıq sistemasın qáliplestiriwge qaratılǵan hár bir aymaq kesiminde tiykarǵı maqsetli kórsetkishlerdi tastıyıqlap barsın hám olarǵa erisiw jaǵdayı ústinen qadaǵalawdı támiyinlesin;
b) Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri tárepinen hár bir aymaq hám kriminogen jaǵdayı awır máhálleler kesiminde Ózbekstan Respublikası Prezidentiniń 2025-jıl 3-yanvardaǵı PQ-1-sanlı qararı menen tastıyıqlanǵan máhálle – rayon – wálayat dárejelerindegi mánzilli ilajlardıń úlgi “jol kartaları” tiykarında hár shereklik aymaqlıq “jol kartaları”n islep shıǵıwdı hám orınlawǵa qaratıwdı shólkemlestirsin;
v) máhállelerde huqıqbuzarlıqlardıń erte profilaktikası baǵdarındaǵı jumıslardıń nátiyjeliligin, sonıń ishinde, orınlarǵa tikkeley shıqqan halda sistemalı túrde bahalasın, sonday-aq, aymaqlıq “jol kartaları”nda názerde tutılǵan ilajlardıń izbe-iz, sapalı hám óz waqtında ámelge asırılıwın turaqlı túrde qatań (sonıń ishinde, elektron qadaǵalaw platforması arqalı) qadaǵalap barsın;
g) hár ayda keminde eki wálayat kesiminde máhállelerde ámelge asırılıp atırǵan jumıslardıń jaǵdayı hám nátiyjeliligi boyınsha barlıq juwapker uyımlar hám mákemeler menen sın kózqarastan dodalawlar ótkeriliwin hám bul máselege juwapkershilik penen qatnas jasamaǵan basshılarǵa lawazımınan bosatıwǵa shekemgi tásir ilajlarınıń kórilip barılıwın jolǵa qoysın;
d) máhállelerde qáwipsiz ortalıqtı jaratıw jumıslarına múnásip úles qosqan juwapker basshılar hám xızmetkerlerdi hár jılı Máhálle sisteması xızmetkerleri kúni múnásibeti menen mámleketlik sıylıqlarǵa usınılıp barsın.
7. a) máhállelerde qáwipsiz ortalıq jaratıw baǵdarında ámelge asırılǵan jumıslar hám olardıń nátiyjeliligi hár ay juwmaǵında – wálayat prokurorları hám ishki isler uyımları baslıqları janında, hár sherek juwmaǵında ishki isler ministri hám Bas prokuror janında tiyisli wálayat hám respublika basshıları qatnasıwında sın kózqarastan dodalanatuǵını jáne Ózbekstan Respublikası Prezidenti Administraciyasına analitikalıq málimleme jáne juwapkerlerdi xoshametlew yamasa intizamiy jazalaw boyınsha usınıslar kirgizilip barılatuǵını;
b) usı qararǵa muwapıq aymaqlarǵa biriktirilgen juwapker basshılar hám mákemeler tárepinen ámelge asırılǵan jumıslardıń jaǵdayı ústinen qadaǵalaw, sonıń ishinde, orınlarǵa tikkeley shıqqan halda olardıń nátiyjeliligin bahalap barıw Muwapıqlastırıw jumısshı toparı hám onıń aymaqlıq shtabları tárepinen támiyinlenetuǵını belgilensin.

IV. Nızam ústinligin támiyinlew ilajları

8. Tómendegilerge:

a) Bas prokurordıń hám ishki isler ministriniń birinshi orınbasarlarına – jınayatlardı esaptan jasırıw, kúndelikli esabatlarǵa jalǵan maǵlıwmatlardı kirgiziw jaǵdaylarına pútkilley shek qoyıwǵa qaratılǵan qatań qadaǵalaw sistemasın jolǵa qoyıw boyınsha;
b) Qaraqalpaqstan Respublikası, wálayatlar hám Tashkent qalası prokurorları hám ishki isler uyımlarınıń basshılarına – jınayat isin qozǵatıwdı tiykarsız bas tartıw, jınayatlardı esaptan jasırıw hám qastan nadurıs kvalifikaciyalaw jaǵdaylarınıń aldın alıwǵa qaratılǵan sistemalı qadaǵalawdı támiyinlew boyınsha;
v) rayon (qala) prokurorları hám ishki isler uyımlarınıń basshılarına – xalıqtıń huqıqbuzarlıq haqqındaǵı hár qanday múrájatların sózsiz dizimge alıw, kórip shıǵıw nátiyjesinde qabıl etilgen qararlardıń nızamlılıǵın úyreniw jáne barlıq jınayıy jaǵdaylar boyınsha belgilengen ilajlardıń óz waqtında, nızamlı hám tolıq ámelge asırılıwın shólkemlestiriw boyınsha jeke juwapkershilik júklensin jáne bul baǵdarda qatań ilajlar kóriliwi haqqında eskertilsin.
Ishki isler ministrligi (A.Tashpulatov):
a) 2026-jıldıń aqırına shekem puqaralardıń huqıqbuzarlıqlar haqqındaǵı awızeki múrájatların taraw hám aymaqqa qaramastan, ishki isler uyımları xızmetkerleriniń xızmet planshetleri arqalı real waqıt rejiminde birden-bir tártipte qabıl etiw hám tiyisliligi boyınsha operativ múnásibet bildiriw ámeliyatın jolǵa qoysın;
b) 2026-jıl 1-noyabrge shekem puqaralar tárepinen máhálle profilaktika inspektorları menen onlayn sóylesiw, foto, audio, video hám táshiwishli xabarlardı jiberiw, sonday-aq, olardıń jumısına baha beriw imkaniyatın beretuǵın “Meniń inspektorım” mobil qosımshasın islep shıǵıw hám ǵalaba en jaydırıw ilajların kórsin;
v) mápdar ministrlikler hám uyımlar menen birgelikte 2026-jıl 1-mayǵa shekem shańaraq-turmıs qatnasıqları sheńberinde júz beriletuǵın jınayatlardıń aldın alıw maqsetinde daw-jánjelli shańaraqlar haqqındaǵı maǵlıwmatlardı jıynaw, tallaw hám monitoring etiw imkaniyatın beretuǵın “E-ijtimoiy profilaktika” málimleme sistemasın “E-nizoli oila” modulın engiziw hám moduldi sudlar arasında tikkeley integraciyalaw ilajların kórsin;
g) 2026-jıl 1-iyulǵa shekem Ózbekstan Respublikası Prezidentiniń 2025-jıl 3-yanvardaǵı PQ-1-sanlı qararı menen belgilengen tártipte tallawlardan kelip shıqqan halda basqa aymaqlardıń kriminogen jaǵday awır hám quramalı máhállelerinde de máhálle huqıq-qorǵaw orınlarınıń jumısın jolǵa qoyıw jáne onda jámiyetlik qáwipsizlikti támiyinlew hám jınayatshılıqtıń aldın alıw boyınsha operativ háreketleniw sistemasın engiziw ilajların kórsin.

V. Qarar orınlanıwın shólkemlestiriw, támiyinlew hám qadaǵalaw

10. Ishki isler ministrligi mápdar ministrlikler hám uyımlar menen birgelikte úsh ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
11. Qarar orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidenti Administraciyası departament baslıǵı D.B.Kadirovqa júklensin.

Ózbekstan Respublikası
Prezidenti Sh.MIRZIYoEV

Tashkent qalası,

2026-jıl 5-yanvar