Ózbekstan Respublikası Prezidentiniń Pármanı

Farmacevtika ónimlerin islep shıǵarıw kólemin arttırıw, xalıq hám densawlıqtı saqlaw mákemeleriniń dári qurallarına bolǵan talabın qaplaw dárejesin jaqsılaw, texnologiyalar transferi arqalı farmacevtika hám biotexnologiya tarawın rawajlandırıw, jańa texnologiyalardı ámeliyatqa engiziw jáne ilimiy izertlew hám óndiriste tolıq qun shınjırın jaratıw maqsetinde qarar etemen:
I. Maqsetler.
1. Tómendegiler 2026-jılı farmacevtika tarmaǵın rawajlandırıwdıń tiykarǵı maqsetleri etip belgilensin:
(a) óndiris kólemin 8,5 trillion sumǵa jetkeriw;
(b) qunı 1 milliard AQSh dolları bolǵan perspektivalı investiciyalıq joybarlardı qáliplestiriw;
(v) 800 million AQSh dolları muǵdarında jańa investiciyalıq joybarlardı baslaw;
(g) ónim hám xızmetler eksportın 300 million AQSh dollarına jetkeriw;
(d) 350 túrdegi jana ónimlerdi islep shıǵarıwdı ózlestiriw;
(j) “Tashkent Pharma Park” innovaciyalıq ilimiy-óndirislik farmacevtika klasteri aymaǵın keńeytiw arqalı regiondaǵı biotexnologiya hám farmacevtika ilimiy-izertlew hám óndiris xabı – “BioPharma City”ge aylandırıw.
II. Tarmaq kárxanaların qollap-quwatlaw ilajları
2. Farmacevtika tarmaǵında básekige shıdamlı hám sapalı farmacevtika ónimlerin islep shıǵarıw hám investiciyalardı qollap-quwatlaw maqsetinde:
(a) original dári qurallarınıń patent múddeti tamamlanǵanınan soń 1 jıl ishinde usı dári quralların islep shıǵarıwdı jolǵa qoyǵan islep shıǵarıwshılarǵa “texnologiyalar transferi” qárejetleriniń 50 procenti, biraq 50 mıń AQSh dollarınan kóp bolmaǵan bólegi yamasa ónimdi jaratıwdaǵı ilimiy izertlew qárejetleriniń 50 procenti, biraq 100 mıń AQSh dollarınan kóp bolmaǵan bólegi Farmacevtika tarmaǵın qollap-quwatlaw hám rawajlandırıw qorınıń qarjıları esabınan qaplap beriledi;
(b) 2027-jıl 1-yanvardan baslap “Zárúr óndiris ámeliyatı – GMP” milliy sertifikatına iye bolǵan kárxanalarǵa olardıń óndiris liniyalarında usı sertifikat ámel etiw múddeti dawamında belgilengen tártip hám qaǵıydalar tiykarında biologiyalıq aktiv qosımshalardı islep shıǵarıwǵa ruqsat beriledi.
3. 2026-jıl 1-iyunnen baslap:
(a) Tómendegiler Sawdaǵa kómeklesiw qorı qarjıları esabınan qaplap beriletuǵını belgilensin:
(i) dári quralların islep shıǵarıwshılarǵa EU GMP, US FDA GMP rásmiy sertifikatların engiziwde, sonday-aq, Jáhán densawlıqtı saqlaw shólkeminiń prekvalifikaciyasın alıwda sırt el konsalting xızmetleri hám EU GMP, US FDA GMP sertifikatları ushın qárejetlerdiń 50 procenti, biraq 50 mıń AQSh dollarınan kóp bolmaǵan bólegi;
(ii) ilimiy-izertlew institutları hám bilimlendiriw mákemeleri tárepinen jaratılǵan Ózbekstanda islep shıǵarılıwı jolǵa qoyılmaǵan dári quralları hám medicinalıq úskenelerdi islep shıǵarıwshılarǵa usı dári quralların sanaat kóleminde islep shıǵarıp, realizaciya etkennen soń dizimnen ótkeriw, klinikalıq sınaw hám bioekvivalentlik izertlewleri qárejetleriniń 80 procenti, biraq 8 mıń AQSh dollarınan kóp bolmaǵan muǵdarda;
(b) usı Pármannıń 1-qosımshasına muwapıq joqarı texnologiyalı dári quralların islep shıǵarıwǵa qaratılǵan jańa investiciyalıq joybarlardı 3 jıl múddette paydalanıwǵa tapsırıp, sanaat kóleminde islep shıǵarıwdı jolǵa qoyǵan isbilermenlik subektlerine 2 jıl múddetke joybar sheńberinde tartılǵan kreditler boyınsha kredit procent qárejetleri Farmacevtika tarmaǵın qollap-quwatlaw hám rawajlandırıw qorınıń qarjıları esabınan tómendegi tártipte kompensaciya etilip beriletuǵını belgilensin:
(i) procent stavkası Oraylıq bank tiykarǵı stavkasınıń eki esesinen kóp bolmaǵan milliy valyutadaǵı kreditlerdiń tiykarǵı stavkadan 4 procentlik punkt joqarı bólegi, biraq 10 procentlik punktten aspaǵan muǵdarda;
(ii) sırt el valyutasındaǵı kreditler procent stavkasınıń 6 procentten joqarı bólegi, biraq 4 procentlik punktten aspaǵan muǵdarda.
4. (a) 2026-jıl 1-iyunnen baslap farmacevtika hám basqa da islep shıǵarıwshı kárxanalarǵa, burınǵısınan basqasha tárizde, Salıq komitetiniń málimleme baǵdarlaması arqalı operatorlarǵa beriletuǵın maǵlıwmatqa bola salıqlar hám jıyımlardı tólew boyınsha bazalıq esaplaw muǵdarınıń eki esesinen kóp bolmaǵan muǵdarda qarızdarlıq bar bolǵan jaǵdayda, qarızdarlıq summası usı muǵdardan joqarı bolǵan jaǵdaylarda bolsa qarızdarlıq qáliplesken kúnnen baslap on kúnlik múddette mámleketlik satıp alıwlarda qatnasıwǵa ruqsat berilsin;
(b) 2026-jıl 1-sentyabrge shekem lokalizaciyalaw dárejesine qaramastan, belgilengen tártipte jergilikli islep shıǵarılǵan tovar haqqındaǵı sertifikatqa iye bolǵan farmacevtika hám basqa da ónimlerdi islep shıǵarıwshı kárxanalarǵa elektron kooperaciya portalı, islep shıǵarıwshılar ekosisteması, jergilikli aukcion sawdaları hám “milliy dúkan”da usı ónimlerdi realizaciyalawǵa ruqsat beriletuǵını belgilep qoyılsın.
5. Sanaat kooperaciyası hám mámleketlik satıp alıwlar agentligi eki ay múddette “Mámleketlik satıp alıwlar haqqında”ǵı Nızamǵa usı Pármannıń 4-bántinen kelip shıǵatuǵın ózgerisler hám qosımshalar kirgiziwdi názerde tutatuǵın nızam joybarın Ministrler Kabinetine kirgizsin.
III. Jeńillikler.
6. (a) farmacevtika ónimlerin islep shıǵarıw, dárilik ósimliklerdi mádeniy halda jetistiriw yamasa olardı qayta islewge baǵdarlanǵan investiciyalıq joybarlardı ámelge asırıwshı isbilermenlik subektleri 2040-jılǵa shekem investiciyalıq joybarlar baslanǵan sáneden baslap 3 jıl múddetke investiciyalıq joybarlar ámelge asırılatuǵın jer uchastkaları boyınsha jer salıǵı, investiciyalıq joybarlar paydalanıwǵa qabıl etilgen kúnnen baslap 3 jıl múddetke investiciyalıq joybarlar sheńberinde payda salıǵı jáne qurılǵan kóshpes múlk obektleri boyınsha múlk salıǵınan azat etiletuǵını;
(b) jumısın turaqlı mákeme arqalı ámelge asırmaytuǵın rezidentlerdiń Ózbekstan Respublikası aymaǵında dári quralları hám medicinalıq úskenelerdi islep shıǵarıwda qollanılatuǵın texnologiyalar transferi hám brend atı ushın royalti kórinisinde alınatuǵın dáramatları boyınsha, eger Ózbekstan Respublikasınıń xalıqaralıq shártnamalarında basqasha qaǵıyda názerde tutılmaǵan bolsa, payda salıǵınıń stavkası 2030-jıl 1-yanvarǵa shekem 5 procent muǵdarında qollanılatuǵını belgilep qoyılsın.
7. Usı Pármannıń 6-bánti “a” kishi bántinde názerde tutılǵan salıq jeńillikleri islep shıǵarılǵan farmacevtika ónimlerin realizaciyalawdan yamasa dárilik ósimliklerdi mádeniy halda jetistiriw yamasa olardı qayta islewden alınǵan dáramatlardıń úlesi salıq tólewshiniń jámi dáramatınıń ulıwma kóleminde keminde 60 procentti quraǵanda qollanılatuǵını belgilensin.
Onda Ózbekstan Respublikası Investiciyalar, sanaat hám sawda ministrligi jáne Farmacevtika tarmaǵın rawajlandırıw agentligi tárepinen salıq uyımlarına investiciyalıq joybardı ámelge asırıw baslanǵan sáne hám onı paydalanıwǵa tapsırıw sánesi haqqındaǵı maǵlıwmatlar usınılıp barıladı.
8. Ekonomika hám qarjı ministrligi Farmacevtika tarmaǵın rawajlandırıw agentligi menen birgelikte úsh ay múddette Salıq kodeksine usı Pármannıń 6-bántinen kelip shıǵatuǵın ózgerisler hám qosımshalar kirgiziwdi názerde tutatuǵın nızam joybarın Ministrler Kabinetine kirgizsin.
9. Sonday tártip ornatılsın, oǵan muwapıq:
(a) farmacevtika jumısı menen shuǵıllanıwshı yuridikalıq shaxslar tárepinen Densawlıqtı saqlaw ministrligine yamasa mámleketlik medicina mákemelerine insanıylıq járdemi sıpatında ámel etiw múddeti qısqalıǵı sebepli biypul beriletuǵın jaramlılıq múddeti tamamlanıwına shekem keminde 6 ay qalǵan dári quralları hám medicinalıq úskeneler salıq salıw maqsetinde bunday yuridikalıq shaxslardıń ekonomikalıq jaqtan ózin aqlaǵan qárejetleri dep tán alınadı. Onda:
(i) usı bántke muwapıq beriletuǵın hám shegirme ushın qabıl etiletuǵın dárilik zatlar hám medicina buyımlarınıń qunı haqıyqıy óndiris yamasa satıp alıw ózine túser bahasınan kelip shıǵıp, oǵan sawda ústemesin kirgizbesten anıqlanadı;
(ii) dári quralları hám medicinalıq úskenelerdiń bahasın asırıp kórsetiw, tapsırılǵan múlktiń qálibekiligi, qayta aylanısı yamasa belgilengen tártipke boysınbaw jaǵdayları anıqlanǵan jaǵdayda, tiyisli baha salıqlar, penyalar qosımsha esaplanǵan hám nızam hújjetlerine muwapıq juwapkershilik ilajları qollanılǵan halda qárejetler quramınan shıǵarıp taslanadı;
(b) 2026-jıl 1-aprelden baslap biologiyalıq aktiv qosımsha hám kosmetika quralların islep shıǵarıwshı kárxanalarǵa Ózbekstan Respublikası Prezidentiniń 2022-jıl 21-yanvardaǵı “2022-2026-jıllarda respublikanıń farmacevtika tarmaǵın jedel rawajlandırıwǵa baylanıslı qosımsha ilajlar haqqında”ǵı PP-55-sanlı Pármanınıń 5-bántinde názerde tutılǵan bajıxana jeńillikleri qollanıladı.
10. Salıq kodeksiniń 305-statyasına muwapıq import etilgen tovarlardı, sonıń ishinde, referent baha qollanılatuǵın dári quralların alıp kiriwde haqıyqatta tólengen qosımsha qun salıǵınıń summası menen olardı realizaciyalaw bahasınan kelip shıqqan halda esaplanǵan qosımsha qun salıǵınıń summası arasındaǵı unamlı ózgeshelik ekonomikalıq jaqtan ózin aqlaǵan qárejetler dep tán alınadı hám payda salıǵı boyınsha salıq bazasın anıqlawda jámi dáramattan shegirme etiliwi belgilengenligi maǵlıwmat ushın qabıl etilsin.
IV. Qarjılandırıw derekleri
11. Ózbekstan Respublikası Prezidentiniń 2025-jıl 28-yanvardaǵı “Farmacevtika tarmaǵın jedel rawajlandırıwǵa baylanıslı qosımsha ilajlar haqqında”ǵı PP-13-sanlı Pármanınıń 6-bántinde Tikleniw hám rawajlanıw qorınan ajıratılıwı belgilengen 30 million AQSh dolları muǵdarındaǵı qarjılar Ózbekstan Respublikası Prezidentiniń 2024-jıl 10-yanvardaǵı PP-14-sanlı qararınıń 7-bántinde belgilengen maqsetlerge qaratılsın.
12. Farmacevtika tarmaǵın rawajlandırıw agentligi 2026-2027-jıllarda sáykes túrde Ózbekstan Respublikası Prezidentiniń 2019-jıl 10-apreldegi PP-5707-sanlı Pármanınıń 7-bántinde belgilengen Tikleniw hám rawajlanıw qorınıń jámi 25 million AQSh dolları muǵdarındaǵı qarjıların “Tashkent Pharma Park” innovaciyalıq ilimiy-óndirislik farmacevtika klasteriniń ilimiy izertlew orayı, farmacevtika ónimleriniń qáwipsizligin tekseriw laboratoriyası hám vivariy imaratların qurıw jáne úskenelew jumısların jedellestiriw maqsetinde 3 jıllıq jeńilletilgen dáwir menen 10 jıl múddetke jıllıq 4 procent stavkada tartıw ilajların kórsin.
13. (a) farmacevtika kárxanaları tárepinen usı Pármannıń 11-bántinde názerde tutılǵan shiyki zat hám ásbap-úskenelerdi satıp alıwda import kontraktları mámleketimizde akkreditaciyadan ótken xalıqaralıq konsalting kompaniyaları tárepinen ekspertizadan ótkeriletuǵını;
(b) usı Pármannıń 12-bántinde názerde tutılǵan kredit qarjıların Tikleniw hám rawajlanıw qorına qaytarıw Farmacevtika tarmaǵın rawajlandırıw agentligi hám “Farmacevtika ónimleri qáwipsizligi orayı” mámleketlik mákemesi tárepinen ámelge asırılatuǵını belgilensin.
14. Farmacevtika tarmaǵın rawajlandırıw agentligine jergilikli óndiris kárxanaları qánigeleriniń mamanlıǵın arttırıw maqsetinde “Pharm Service” mámleketlik mákemesi xızmetkerleriniń mamanlıǵın arttırıw hám qayta tayarlaw, sonday-aq, mamanlıǵın arttırıw kurslarına sırt elli qánigelerdi tartıw ushın Farmacevtika tarmaǵın qollap-quwatlaw hám rawajlandırıw qorınan qarjı qaratıwǵa ruqsat berilsin.
V. Farmacevtika ónimleriniń sapası hám qáwipsizligin arttırıw
15. Sonday tártip ornatılsın, oǵan muwapıq 2028-jıl 1-yanvardan baslap:
(a) biologiyalıq aktiv qosımshalarǵa ruqsat beriwde Qáwiplerdi tallaw hám kritikalıq qadaǵalaw noqatları (HAACP) sisteması engizilgen bolıwı talap etiledi;
(b) biologiyalıq aktiv qosımshalar májbúriy cifrlı markirovkadan ótkeriledi.
16. Densawlıqtı saqlaw ministrligi, Ózbekstan texnikalıq jaqtan tártipke salıw agentligi hám Awıl xojalıǵı ministrliginiń Ózbekstan Respublikası Prezidentiniń 2018-jıl 20-iyundegi “Ózbekstan Respublikasında miywe-ovoщ tarawın rawajlandırıw” joybarın Xalıqaralıq tikleniw hám rawajlanıw bankiniń qatnasıwında ámelge asırıw baǵdarındaǵı qosımsha ilajlar haqqında”ǵı PQ-3790-sanlı qararına muwapıq Xalıqaralıq tikleniw hám rawajlanıw bankiniń qarız qarjıları esabınan satıp alınǵan, biraq Ózbekstan texnikalıq jaqtan tártipke salıw agentligi tárepinen paydalanıwǵa zárúrlik bolmaǵan sınaw úskeneleri, járdemshi qurallar hám laboratoriya mebellerin Densawlıqtı saqlaw ministrliginiń “Farmacevtika ónimleri qáwipsizligi orayı” mámleketlik mákemesine balans qaldıq bahasında biyǵárez ótkeriw haqqındaǵı usınısına kelisim berilsin.
Onda Xalıqaralıq tikleniw hám rawajlanıw banki aldındaǵı qarızdı qaytarıw, procentlerdi tólew hám qarızǵa xızmet kórsetiw menen baylanıslı basqa da qárejetler Ózbekstan texnikalıq jaqtan tártipke salıw agentligi hám “Farmacevtika ónimleri qáwipsizligi orayı” mámleketlik mákemesi tárepinen solidar tártipte ámelge asırıladı.
VI. Farmacevtika tarawında kadrlar tayarlaw hám ilimdi rawajlandırıw
17. Densawlıqtı saqlaw ministrligi, Joqarı bilimlendiriw, ilim hám innovaciyalar ministrligi hám Farmacevtika tarmaǵın rawajlandırıw agentliginiń:
(a) Ózbekstan ximiya-farmacevtika ilimiy-izertlew institutı, Tashkent vakcina hám sıvorotkalar ilimiy-izertlew institutı hám “Shıǵıs medicinası” ilimiy-izertlew institutları negizinde Milliy biofarmacevtika ilimiy-izertlew institutın (keyingi orınlarda – Institut) shólkemlestiriw;
(b) Instituttıń tiykarǵı wazıypaların 2-qosımshaǵa muwapıq tastıyıqlaw haqqındaǵı usınıslarına kelisim berilsin.
18. (a) Institut Ózbekstan ximiya-farmacevtika ilimiy-izertlew institutı, Tashkent vakcina hám sıvorotkalar ilimiy-izertlew institutı hám “Shıǵıs medicinası” ilimiy-izertlew institutlarınıń huqıq hám minnetlemeleri, sonday-aq, dúzilgen shártnamaları boyınsha huqıqıy miyrasxorı bolıp esaplanatuǵını;
(b) Ózbekstan ximiya-farmacevtika ilimiy-izertlew institutı, Tashkent vakcina hám sıvorotkalar ilimiy-izertlew institutı hám “Shıǵıs medicinası” ilimiy-izertlew institutlarınıń ámeldegi qarjılandırıw derekleri, shtat birlikleri, múlki hám basqa da tovar-materiallıq baylıqları Institutqa ótkeriletuǵını;
(v) Institut strukturası hám onıń Farmacevtika tarmaǵın qollap-quwatlaw hám rawajlandırıw qorınıń qarjıları arqalı qarjılandırılatuǵın shtat birlikleriniń sanı Farmacevtika tarmaǵın rawajlandırıw agentligi tárepinen tastıyıqlanatuǵını belgilensin.
19. Mektepke shekemgi hám mektep bilimlendiriwi ministrligi 2026-2027-oqıw jılınan baslap Abu Ali ibn Sino atındaǵı qánigelestirilgen mektepte tájiriybe-sınaq tárizinde Farmacevtika texnikalıq universiteti menen óz-ara integraciya tiykarında oqıwshılardı turmıslıq pánler tiykarlarına úyretiw boyınsha tómendegilerdi názerde tutatuǵın bilimlendiriw baǵdarlamaların (keyingi orınlarda – turmıslıq pánler baǵdarlamaları) engizsin:
(a) Abu Ali ibn Sino atındaǵı qánigelestirilgen mekteptiń (keyingi orınlarda – mektep) oqıw procesi 5 jıllıq baǵdarlamalar tiykarında STEM modeli boyınsha shólkemlestiriledi. Bunda dáslepki 3 jılda ústinlik oqıwshılarda ximiya, biologiya, fizika, matematika hám inglis tili boyınsha fundamental bilimlerdi qáliplestiriwge, sońǵı 2 jılda bolsa tábiyǵıy pánler tiykarında baslanǵısh tayarlıqtı támiyinlewge qaratıladı;
(b) mekteptiń 10-11-klassları hám Farmacevtika texnikalıq universitetiniń (keyingi orınlarda – universitet) tiyisli bakalavriat baǵdarlarınıń 1-kurs oqıw rejeleri óz-ara integraciyalanadı. Onda joqarı oqıw ornınıń oqıw rejesine baylanıslı pánler (keyingi orınlarda – joqarı bilimlendiriw pánleri) oqıwshılardıń tańlawı tiykarında qosımsha oqıtıladı;
(v) joqarı bilimlendiriw pánleri universitettiń professor-oqıtıwshıları tárepinen oqıtıladı hám bul processke baylanıslı barlıq qárejetler usı universitettiń byudjetten tısqarı qarjıları esabınan qaplanadı;
(g) tómendegi talaplardı orınlaǵan mektep pitkeriwshilerine universitettiń tiyisli tálim baǵdarında 2-kurstan test sınaqlarısız hám qosımsha imtixanlarsız oqıwdı dawam ettiriw huqıqı beriledi:
(i) IELTS sertifikatı (6,5 ball) yamasa Bilim hám tájiriybelerdi bahalaw agentligi tárepinen beriletuǵın V2 sertifikatı hám de universitettiń bagdarına qarap biologiya hám ximiya pánlerinen biri boyinsha keminde B+ dárejedegi hám de oǵan teńlestirilgen sertifikatqa iye boliw;
(ii) joqarı bilimlendiriw pánleri boyinsha akademiyalıq kórsetkishlerdi (Academic Performance) ornatılǵan talap boyınsha ózlestirgenligi.
VII. Pármannıń orınlanıwın shólkemlestiriw, támiyinlew hám qadaǵalaw
20. Farmacevtika tarmaǵın rawajlandırıw agentligi Awıl xojalıǵı ministrligi hám Tashkent wálayatı hákimligi menen birgelikte bir ay múddette “Tashkent Pharma Park” innovaciyalıq ilimiy-óndirislik farmacevtika klasteri aymaǵın keńeytiw maqsetinde oǵan tutas aymaqtan qosımsha 100 gektar jer uchastkaların belgilengen tártipte ajıratıw boyınsha usınıslardı Ministrler Kabinetine kirgizsin. Onda jer iyeleri, jerden paydalanıwshılar, jer uchastkalarınıń ijarashıları hám múlk iyelerine jetkerilgen zıyannıń ornın qaplaw Ministrler Kabineti janındaǵı Fizikalıq hám yuridikalıq táreplerge jetkerilgen múlklik zıyandı kompensaciyalaw boyınsha respublikalıq maqsetli qor esabınan qaplaw, sonday-aq, jer uchastkaları ushın awıl xojalıǵı hám toǵay xojalıǵı óndirisi shıǵınlarınıń ornın joybar intakerleri tárepinen 5 jılǵa shekemgi múddette bólip-bólip tólew názerde tutılsın.
21. Farmacevtika tarawında óndiristi keńeytiw, eksporttı jedellestiriw, jańa investiciyalıq joybarlardı islep shıǵıw, potenciallı sırt el investorların hám xalıqaralıq brendlerdi tartıw maqsetinde Farmacevtika tarmaǵın qollap-quwatlaw hám rawajlandırıw qorınıń qarjıları esabınan qarjılandırılatuǵın hám qosımsha ajıratılatuǵın 15 shtat birliginen ibarat bolǵan yuridikalıq shaxs statusına iye bolmaǵan Farmacevtika sanaatı joybarlaw ofisi shólkemlestirilsin. Onda Farmacevtika sanaatı joybarlaw ofisi xızmetkerlerine Farmacevtika tarmaǵın rawajlandırıw agentligi xızmetkerleri ushın belgilengen miynetke haqı tólew hám materiallıq xoshametlew shártleri qollanıladı.
22. Farmacevtika tarmaǵında óndirislik hám ilimiy-izertlew processlerin jetilistiriwge qaratılǵan ilajlar rejesi 3-qosımshaǵa muwapıq tastıyıqlansın.
23. Ózbekstan Respublikası Prezidentiniń hám Ózbekstan Respublikası Húkimetiniń ayırım hújjetlerine 4-qosımshaǵa muwapıq ózgerisler hám qosımshalar kirgizilsin.
24. Farmacevtika tarmaǵın rawajlandırıw agentligi mápdar ministrlikler hám uyımlar menen birgelikte eki ay múddette nızamshılıq hújjetlerine usı Pármannan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
25. Ekonomika hám qarjı ministrligi, Ózbekstan texnikalıq jaqtan tártipke salıw agentligi, Awıl xojalıǵı ministrligi hám Densawlıqtı saqlaw ministrligi Ózbekstan texnikalıq jaqtan tártipke salıw agentligi tárepinen sınaw úskenelerin, járdemshi qurallardı hám laboratoriyalıq mebellerdi “Farmacevtika ónimleri qáwipsizligi orayı” mámleketlik mákemesine ótkeriwde qarız qarjısı menen baylanıslı minnetlemelerdi qaytarıw boyınsha huqıq hám talaplardı ótkeriw haqqındaǵı kelisimge ózgerisler hám qosımshalar kirgiziliwin támiyinlesin.
26. Usı Pármannıń orınlanıwın nátiyjeli shólkemlestiriwge juwapker etip densawlıqtı saqlaw ministri A.A. Xudayarov hám Farmacevtika tarmaǵın rawajlandırıw agentliginiń direktorı A.A. Azizov belgilensin.
27. Pármannıń orınlanıwın dodalap barıw, orınlaw ushın juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa júklensin.

Ózbekstan Respublikası Prezidenti
Sh.Mirziyoev.