Joqarǵı sud baslıǵınıń orınbasarı Sh.Polvonov Germaniya Federativlik Respublikası Ádillik ministrligi janındaǵı Xalıqaralıq huqıqıy birge islesiw qorınıń direktorı Sh.Xyulsxyorster menen ushırastı.
Onda sud-huqıq sistemasın bunnan bılay da jetilistiriw, puqara hám isbilermenlerdiń huqıqları menen nızamlı máplerin isenimli qorǵaw ilajların kúsheytiw, ádil sudlawdı nátiyjeli támiyinlew hám sudyalar jámiyetshiliginiń rolin arttırıw baǵdarında ámelge asırılıp atırǵan keń kólemli reformalar haqqında maǵlıwmat berildi.
Sudlardıń jumısına jasalma intellekt texnologiyaları, atap aytqanda, “Sanlı sud” koncepciyasın engiziw arqalı ádil sudlawǵa erisiw dárejesin arttırıwǵa qaratılǵan reformalar olarda úlken qızıǵıwshılıq oyattı.
Sonıń menen birge, mámleketimizde mámleketlik uyımlar menen qatnasıqlarda puqaralar hám isbilermenlerdiń huqıqların qorǵawdı támiyinlewde sistemalı reformalar alıp barılıp atırǵanı atap ótildi.
Atap aytqanda, Ózbekstan Respublikası Prezidentiniń 2025-jıl 30-yanvardaǵı “Puqaralar hám isbilermenlik subektleriniń huqıqların sud arqalı qorǵawdıń zamanagóy mexanizmlerin engiziwge baylanıslı qosımsha ilajlar haqqında”ǵı qararı menen tastıyıqlanǵan Ózbekstan Respublikası hákimshilik sud jumısların júrgiziw haqqındaǵı nızamshılıqtı jetilistiriw koncepciyasın ámelge asırıw sheńberinde jańa redakciyadaǵı Hákimshilik sud jumısların júrgiziw haqqındaǵı kodeks joybarı ústinde keń kólemli jumıslar alıp barılıp atırǵanı atap ótildi.
Germaniya hákimshilik sudlaw sisteması rawajlangan mámleket esaplanadı. Sol sebepli, sóylesiw waqtında bul tarawdaǵı Germaniya sudlarınıń tájiriybesi Ózbekstan ushın qızıqlı hám áhmiyetli ekeni aytıp ótildi. Sonıń menen birge, hákimshilik sud islerin júrgiziwdegi birge islesiw mámleketimizde bul tarawdı jetilistiriw, sudyalardıń mamanlıǵın arttırıw, aldınǵı sırt el tájiriybesin úyreniw hám tallaw arqalı respublikamızda hákimshilik ádil sudlawdı rawajlandırıwǵa óz úlesin qosatuǵınına isenim bildirildi.
Germaniya xalıqaralıq huqıqıy birge islesiw qorınıń joybarları sheńberindegi birge islesiwdiń basqa da máseleleri dodalandı.
Miymanlar sudlardıń jumısına engizilgen málimleme-kommunikaciya texnologiyaları, sanlastırıw processleri jáne fizikalıq hám yuridikalıq tárepler ushın jaratılǵan interaktiv xızmetlerdiń imkaniyatları menen jaqınnan tanıstı. Joqarı sudtıń muzeyin kózden ótkerdi.
N.Abduraimova, ÓzAnıń xabarshısı