Nókis qalasındaǵı Aq quw kompleksinde «8-mart – Xalıqaralıq hayal-qızlar kúni» múnásibeti menen bayram saltanatı bolıp ótti.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, respublikamızdıń hayal-qızların bayram menen qızǵın qutlıqladı.
Bunnan soń ilajda elimiz ǵárezsizligin bekkemlew, onıń sociallıq-ekonomikalıq potencialın arttırıwǵa qosqan úlesleri hám jas áwladtı Watanǵa sadıqlıq, ulıwmainsaniylıq qádiriyatlar ruwxında tárbiyalawdaǵı xızmetleri ushın bir topar hayal-qızlarǵa «Ardaqlı nuranıy», «Ibratlı hayal», «Watan pidayısı», «Úmit ushqını» kókirek belgileri, Ózbekstan Respublikası Shańaraq hám hayal-qızlar komitetiniń «Mwtabar ayol» kókirek nıshanı, Qaraqalpaqstan Respublikası Ministrler Keńesiniń «Húrmet jarlıǵı» tapsırıldı.
Bayram saltanatı respublikamızǵa belgili kórkem óner hám mádeniyat xızmetkerleri atqarıwındaǵı koncert baǵdarlaması menen dawam etip, onda atqarılǵan qosıq hám ayaq-oyınlar qatnasıwshılarǵa joqarı keypiyat inam etti.
Ilajǵa Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanov qatnastı.

Qaraqalpaqstan xabar agentligi