Házirgi waqıtta Mámleketlik kadastrlar palatası Qaraqalpaqstan Respublikası basqarması filiallarındaǵı arxivlerde jámi 490876 kadastr hújjeti saqlanbaqta. Sonnan búgingi kúnde 212539 dana arxiv hújjetine xatlaw jumısları ótkerilip qayta tártiplestirilgen.
Arxiv hújjetlerin xatlawdan ótkeriw nátiyjesinde Mámleketlik kadastrlar palatası tárepinen tastıyıqlanǵan «Metodikalıq qollanba»ǵa muwapıq hújjetlerdiń tártibin durıs júrgiziw hám olardı nomerlew, sonday-aq, sanlastırıw jumısları alıp barılıp, bar bolǵan 490876 dana kadastr hújjetinen 95 procenti sanlastırıldı.
– Bul arxiv kadastr hújjetlerin jumıs babında paydalanıwda ańsat hám tez tabılıwın támiyinlep, elektron nusqalarınıń jıllar dawamında sapalı saqlanıwına erispektemiz, – deydi basqarmanıń baspasóz xızmetiniń baslıǵı P.Ájimuratov.
Mámleketlik kadastrlar palatası tárepinen arxiv hújjetlerdiń saqlanıwına ayrıqsha itibar qaratılıp, hár qanday ayrıqsha jaǵdaylar júz bergende hújjetlerdiń qáwipsiz, uzaq múddetke saqlanıwın támiynlew hám keleshek áwladqa sapalı halda jetkerip beriw maqsetinde Mámleketlik kadastrları palatası Qaraqalpaqstan Respublikası basqarmasınıń Nókis qalalıq, Ámiwdárya, Tórtkúl, Beruniy, Kegeyli hám Ellikqala rayonlıq filiallarında mobil stelajlar ornatıldı.
2026-jılǵı rejege muwapıq, Nókis rayonı filialına zamanagóy mobil stelajlar ornatılıp, Moynaq, Końırat, Ellikqala, Shomanay rayonlarda arxiv kadastr hújjetlerin nomerlep qayta tártiplestiriw, yaǵnıy xatlaw jumısların juwmaqlaw rejelestirilmekte.
Sonday-aq, hújjetlerdiń sapalı hám uzaq múddetke saqlanıwın támiyinlew maqsetinde Mámleketlik kadastrları palatası Qaraqalpaqstan Respublikası basqarmasınıń ózinde arxiv xanası da shólkemlestirildi hám tiyisli tártipte ishki hújjetleriniń saqlanıwı támiyinlenbekte.

Á.Jiyemuratov,
Qaraqalpaqstan xabar agentligi.