Nókis qalalıq prokuraturası hám Májbúriy orınlaw byurosı baslaması menen Kámbaǵallıqtı qısqartıw hám bántlikke kómeklesiw bólimi birgelikte jumıssız aliment tólewshilerdiń bántligin támiyinlew maqsetinde usı jıldıń 26-fevral kúni Nókis qalasındaǵı Jaslar orayı imaratında miynet yarmarkası ótkerildi.
Yarmarkaǵa Nókis qalası prokurorı, Májbúriy orınlaw byurosı Nókis qalalıq bólimi baslıǵı, MOB Nókis qalalıq bólimi juwapker xızmetkerleri, sonday-aq, 35 jumıssız aliment tólewshiler hám basqa da puqaralar qatnastı.
Bos jumıs orınları miynet yarmarkasında Nókis qalasındaǵı 25 kárxana, mákeme hám shólkem ózlerindegi bar bolǵan jámi 108 bos jumıs orınların usındı. Nátiyjede 24 puqara turaqlı jumıs orınları menen támiyinlenip, 3 puqaraǵa kásipke qayta tayarlaw kurslarına jollamalar berildi.
Sonday-aq, puqaralarǵa miynet qatnasıqlarına baylanıslı tarawlar boyınsha ózlerin qızıqtırǵan sorawlar boyınsha huqıqıy másláhátler berildi.
Bunday ilajlar respublika boylap ótkerilip atırǵan bolıp, usı jıldıń ótken dáwiri ishinde jámi 100 den aslam jumıssız aliment tólewshiler jumıs penen támiyinlengen bolıp, bunday ilajlar birinshi gezekte sociallıq qorǵawǵa mútáj bolǵan jas óspirim perzentlerdi materiallıq jaqtan qollap-quwatlawǵa xızmet etedi.

Qaraqalpaqstan xabar agentligi