Arqa-batıs áskeriy okruginde “Kiberqáwipsizlik” aylıǵı sheńberinde “Sergeklik – eń kúshli kiberqorǵaw” súreni astında reje tiykarında oqıw-ámeliy shınıǵıw shólkemlestirildi.
Oqıw Kiberqáwipsizlik bólimi qánigeleri tárepinen alıp barılıp, onda málimleme texnologiyalarınan paydalanıp júz beriwi múmkin bolǵan urlıqlar, onlayn aldawshılıq, ruqsatsız kiriw, maǵlıwmatlardı nızamsız qolǵa kirgiziw hám tarqatıwǵa baylanıslı jaǵdaylar boyınsha tolıq túsinikler berildi. Qatnasıwshılarǵa kiberjınayatshılıqtıń zamanagóy kórinisleri, olardı ámelge asırıw mexanizmleri hám nátiyjeli qorǵanıw usılları sistemalı túrde túsindirildi.
Ilaj dawamında zıyanlı programmalar, fishing hújimleri, sociallıq injenerlik usılları, sonday-aq, jasırın xızmet maǵlıwmatların qolǵa kirgiziwge qaratılǵan qáwipler real waqıyalarǵa jaqınlastırılǵan scenariyler tiykarında tallandı. Ámeliy shınıǵıwlar procesinde áskeriy xızmetkerler shártli kiberhújimlerdi anıqlaw, qáwip dárejesin bahalaw, operativ hám tiykarlanǵan qarar qabıl etiw boyınsha kónlikpelerin bekkemledi.
Sabaqta málimleme qáwipsizliginiń teoriyalıq-huqıqıy tiykarları, lokal tarmaqlarda qáwipsizlikti támiyinlew mexanizmleri, málimleme resursların segmentlew hám qadaǵalaw usılları keńnen sáwlelendirildi. Insan faktorınıń málimleme qáwipsizligindegi ornı ayrıqsha atap ótilip, xızmet jumısında juwapkershilik, sergeklik hám tártiptiń tiykarǵı áhmiyeti atap ótildi.
Sonday-aq, xızmet telefonları hám kompyuter texnikasınan paydalanıw qaǵıydaları, jasırın maǵlıwmatlardı saqlaw hám uzatıwda belgilengen talap hám normalarǵa qatań ámel etiw zárúrligi boyınsha anıq usınıslar berildi. Qatnasıwshılarǵa kúshli parol siyasatın engiziw, eki basqıshlı autentifikaciyadan, licenziyalanǵan antivirus programmalarınan hám qorǵalǵan baylanıs kanallarınan paydalanıw boyınsha ámeliy kórsetpeler berildi. Atap ótilgenindey, globallasıw hám sanlastırıw processleri jedellesip atırǵan búgingi sharayatta málimleme qáwipsizligin támiyinlew hár bir áskeriy xızmetkerdiń tikkeley xızmet minnetlemelerinen biri bolıp esaplanadı. Sonlıqtan, “Kiberqáwipsizlik” aylıǵı sheńberinde ótkerilip atırǵan bunday ilajlar jeke quramnıń málimleme qáwip-qáterlerine qarsı turaqlı immunitetin qáliplestiriw, milliy málimleme mákanın isenimli qorǵaw hám xızmet jumısında zamanagóy qáwipsizlik standartların izbe-iz engiziwge xızmet etpekte.

Qaraqalpaqstan xabar agentligi