“Makkah Halal Forum” ilajı sheńberinde Ózbekstan Sawda-sanaat palatası hám Malayziya Xalıqaralıq marketing hám sawda palatası arasında óz-ara túsinisiw memorandumına qol qoyıldı. Hújjet eki mámleket isbilermen toparları arasındaǵı baylanıslardı bekkemlew hám ámeliy birge islesiwdi keńeytiwge qaratılǵan.
Memorandumǵa Ózbekstan Sawda-sanaat palatası baslıǵınıń birinshi orınbasarı Davronbek Qurbonov hám Malayziya Xalıqaralıq marketing hám sawda palatasınıń basshısı Zuber Bakri qol qoydı. Tárepler bul kelisim arqalı isbilermenler arasında tikkeley sóylesiwdi jolǵa qoyıw, jańa sheriklik qatnasıqların qáliplestiriw hám biznes joybarlardı qollap-quwatlawdı maqset etken.
Kelisimge muwapıq, sawda delegaciyaları hám biznes-missiyalardıń almasıwın shólkemlestiriw, investiciyalıq joybarlardı birgelikte ámelge asırıw, bazarlar haqqındaǵı málimleme menen óz-ara almasıw, xalıqaralıq kórgizbe hám forumlarǵa belsene qatnasıw rejelestirilmekte. Sonday-aq, texnikalıq járdem hám bilimlendiriw baǵdarlamaların jolǵa qoyıw arqalı isbilermenlerdiń mamanlıǵın arttırıw da názerde tutılǵan.
Hadal industriyası, agrosanaat kompleksi, azıq-awqat ónimlerin islep shıǵarıw, toqımashılıq hám xızmetler tarawı tiykarǵı baǵdarlar sıpatında belgilendi. Bul tarmaqlarda qospa joybarlardı ámelge asırıw hám óz-ara investiciya kirgiziw imkaniyatların keńeytiw tiykarǵı wazıypalardan biri bolıp esaplanadı.
Ekonomistlerdiń pikirinshe, bul kelisim jańa qospa joybarlardı ámelge asırıw, investiciyalardı tartıw hám Ózbekstan – Malayziya isbilermenleri ushın jańa bazar imkaniyatların ashıwǵa xızmet etedi.

F.Yaxshiboeva, ÓzA