ÓzLiDeP Qaraqalpaqstan Respublikası Keńesiniń baslaması menen ótkerilip atırǵan “Máhálledegi isbilermen hayal” tańlawı Shomanay rayonında joqarı dárejede shólkemlestirildi. Bul tańlaw hayal-qızlardıń isbilermenlik potencialın júzege shıǵarıw, olardı qollap-quwatlaw hám máhállelerde ekonomikalıq belsendilikti bunnan bılay da kúsheytiwge qaratılǵanı menen áhmiyetli.
Tańlawdıń máhálle basqıshı “Monshaqlı,” “Mádeniyat,” “Taza bazar,” “Sarmanbay kól” hám “Mamıy” mákan puqaralar jıyınlarında bolıp ótti. Onda máhálle turmısında belsene qatnasıp kiyatırǵan isbilermen hayal-qızlar tańlap alındı. Hár bir qatnasıwshınıń iskerligi úyrenilip, olardıń jumıs tájiriybesi, jaratqan jumıs orınları hám máhálleniń rawajlanıwına qosıp atırǵan úlesine ayrıqsha itibar qaratıldı.
Atap aytqanda, “Monshaqlı” máhállesinde jumıs alıp barıp atırǵan ónerment Madina Xojabaeva derlik on jıldan berli milliy ónermentshilikti rawajlandırıp kelmekte. Ol qoy júninen kiyiz gilemler, milliy kóylekler hám ayaq kiyimler tayarlap, ásirler dawamında qáliplesken dástúrlerdi zamanagóy usıl menen úylestirmekte. Onıń ustaxanası tek ǵana jergilikli xalıq emes, al sırt elli turistler ushın da qızıqlı orınǵa aylanǵan. Bul jerde turistler ónim tayarlaw procesin tikkeley baqlap, milliy ónermentshilik sırları menen tanısıw imkaniyatına iye bolmaqta. Itibarlısı, isbilermen tayarlap atırǵan ónimler sırt el bazarlarına eksport etilip, milliy brendimizdi xalıqaralıq kólemde kórsetpekte. Sonıń menen birge, ol óz tájiriybesin jaslarǵa úyretip, kóplegen shákirtler tayarlamaqta hám máhállede hayal-qızlardıń bántligin támiyinlewge múnásip úles qospaqta.
“Mádeniyat” máhállesindegi isbilermen Manzura Shermanova da tigiwshilik baǵdarında óz brendin qáliplestirip, “Marziya Tailor” atelesin jolǵa qoyǵan. Ol zamanagóy hám sapalı kiyimler islep shıǵarıp, ónimlerin jergilikli bazarlarǵa hám qońsılas Qazaqstan Respublikasına eksport etpekte. Házirgi waqıtta ol máhálledegi bes hayal-qızdı turaqlı jumıs penen támiyinlep, olardıń turaqlı dáramat tabıwına sharayat jaratqan. Marziya óz jumısında bazar talabın tereń úyreniw, sapa hám zamanagóy dizaynge tiykarǵı áhmiyet qaratıw arqalı kishi biznesti turaqlı rawajlandırıwǵa erispekte. Bul bolsa jergilikli brendti bekkemlew hám eksport potencialın arttırıwǵa xızmet etpekte.
Sonday-aq, tańlaw sheńberinde “Taza bazar” máhállesinde jeke tártiptegi isbilermen Manzura Rejepovanıń gózzallıq salonı, “Sarmanbay kól” máhállesinde gipsten dekorativ buyımlar islep shıǵarıp atırǵan Shahribonu Yusupova hám “Mamıy” máhállesinde tigiwshilik penen shuǵıllanıp atırǵan Gúljamal Jamievanıń iskerligi menen jaqınnan tanısıldı. Olardıń hár biri óz baǵdarı boyınsha máhállede jańa jumıs orınların jaratıw, xızmet kórsetiwdiń sapasın arttırıw hám xalıqtıń bántligin támiyinlewge múnásip úles qospaqta.
Tańlaw juwmaǵında múnásip dep tabılǵan isbilermen hayal-qızlarǵa rayon basqıshında qatnasıw ushın jollamalar berildi.
Juwmaqlap aytqanda, bunday baslamalar máhállelerde isbilermenlikti rawajlandırıw, hayal-qızlardıń ekonomikalıq belsendiligin arttırıw hám jańa jumıs orınların jaratıwǵa xızmet etpekte. Áhmiyetlisi, belsendi hayal-qızlardı qollap-quwatlaw arqalı shańaraqlardıń abadanlıǵı hám aymaqtıń ekonomikalıq rawajlanıwı bekkemlenbekte.

Qaraqalpaqstan xabar agentligi