Iran AQShtıń qáwiplerine keskin juwap beriwge tayar
AQSh prezidenti Donald Tramptıń qáwip tuwdırıwshı bayanatlarınan soń Iran Sırtqı isler ministrligi itimallı hújimge “dárhal hám kúshli” juwap qaytarılatuǵının bildirdi. Rásmiy Tegeran diplomatiyalıq jollar ashıq ekenin aytqan bolsa da, suverenitetke qol urıwǵa qatań qarsılıq bolatuǵını atap ótildi.
Imran Xannıń densawlıǵı qáwip astında ekeni málim etildi.
Pakistannıń burınǵı bas ministri Imran Xannıń kózi awır jaraqatlanǵanı hám ol tolıq medicinalıq járdem ala almay atırǵanı xabar berildi. The Guardian maǵlıwmatına bola, ol uzaq waqıt jeke kamerada saqlanǵan, waqtında emlenbese kóriw qábiletine turaqlı zıyan jetkeriwi múmkin.
Keniyalı ekoaktiv terekti 72 saat qushaqlap rekord ornattı
22 jaslı Trufena Mutoni terekti úzliksiz 72 saat qushaqlap turıp, Ginnestiń rekordlar kitabına kirdi. Ol bul háreketi arqalı qorshaǵan ortalıqtı qorǵaw hám tábiyatqa abaylı qatnasta bolıwdı úgit-násiyatladı.
Qırǵızstan Hindstannan ayırım importtı waqtınsha qadaǵan etti
Qırǵızstan Nipax virusı qáwpi sebepli Hindstannan ayırım haywanlar hám olardıń ónimlerin import etiwdi waqtınsha toqtattı. Virus haywanlardan adamǵa juǵıwı múmkin bolǵan qáwipli infekciya esaplanadı hám házirshe oǵan qarsı vakcina joq.
Kolumbiyada jolawshı samolyotı apatshılıǵı: 15 adam qaytıs boldı
Kolumbiyada Satena aviakompaniyasına qaraslı Beechcraft 1900 samolyotı qulawı aqıbetinde bortta bolǵan barlıq 15 jolawshı hám ekipaj aǵzaları qaytıs boldı. Samolyot Kukutadan Okaniyaǵa ushıp baratırǵan bolǵan, apatshılıq sebepleri úyrenilmekte.
Ázerbayjanda balalar ushın sociallıq tarmaqlardı sheklew usınıs etildi
Ázerbayjan parlamenti balalardıń sociallıq tarmaqlardan paydalanıwın tártipke salıw máselesin dodalamaqta. Usınısqa bola, jas óspirimler ushın ruqsat etilgen kontent hám paydalanıw qaǵıydaları engiziliwi múmkin.
Siriya prezidenti Rossiya menen áskeriy bazalar máselesin dodaladı
Siriya prezidenti Ahmad Ash-Shara Moskvada Vladimir Putin menen ushırasıp, Rossiyanıń Siriyadaǵı áskeriy bazaları hám aymaqlıq qadaǵalaw máselelerin dodaladı. Sonday-aq, ekonomikalıq birge islesiw hám Siriyanıń aymaqlıq pútinligin tiklew temalarına itibar qaratıldı.

Qaraqalpaqstan xabar agentligi