Nızam joybarına túsinik

Mámleketimizde zergerlik sanaatın bunnan bılay da rawajlandırıw, respublikamızda islep shıǵarılıp atırǵan zergerlik buyımlarınıń sırtqı bazarda básekige shıdamlılıǵın támiyinlew jáne zergerlik buyımlarınıń eksportın arttırıwǵa qaratılǵan jumıslardıń nátiyjesinde zergerlik sanaatında sezilerli ósiw baqlanbaqta.
Atap aytqanda, 2025-jıldıń ózinde tarawda jumıs alıp barıp atırǵan isbilermenlerdiń sanı 2 mıń 700 den astı. Yaǵnıy, derlik 4 esege kóbeydi. Eksport kórsetkishi bolsa 5,1 tonnaǵa yamasa 439 million AQSh dollarına jetti. Bul bolsa ótken jılǵa salıstırǵanda eksport kólemi 4,7 esege artqanın kórsetedi.
Endi bahalı metallardan tayarlanǵan yarım tayar zergerlik buyımların Ózbekstan Respublikası bajıxana aymaǵınan sırtqa alıp shıǵıwda Ekonomika hám qarjı ministrligi janındaǵı Mámleketlik saplılıq dárejesin qadaǵalaw inspekciyasınıń juwmaǵın alıw názerde tutılmaqta.
Bul bolsa bahalı metallar hám bahalı taslar, olardan tayarlanǵan zergerlik hám basqa da buyımlardıń nızamsız aylanısın azaytıwǵa xızmet etedi.
Parlamenttiń tómengi palatası tárepinen qabıl etilgen yarım tayar zergerlik buyımların Ózbekstan Respublikası bajıxana aymaǵınan sırtqa alıp shıǵıw tártibin jetilistiriwge qaratılǵan nızam joybarında bul máseleler óz kórinisin tapqan.
Usı hújjetke bola, 2029-jıl 1-fevralǵa shekem zergerlik tarawındaǵı islep shıǵarıwshılarǵa bir qatar jeńillikler beriw názerde tutılmaqta. Yaǵnıy, olardıń jaratıp atırǵan jumıs ornına qarap, satıp alıp atırǵan qımbat bahalı metall hám altın bahasında (1 procentten 4 procentke shekem) shegirme berilmekte. Qánigelerdiń atap ótiwinshe, hesh bir mámlekette bunday jeńillik joq.
Bul nızam joybarında názerde tutılıp atırǵan normalar bahalı metallar hám bahalı taslardıń aylanısı tarawındaǵı mámleketlik siyasattı jetilistiriw, jergilikli zergerlik sanaatın rawajlandırıw jáne nızamlı jumıs alıp barıp atırǵan jergilikli isbilermenlerdi qollap-quwatlawǵa xızmet etedi.

Muhtarama Komilova,
ÓzA