Sońǵı jılları Ózbekstan ekonomikasında sanaat tarmaǵı jetekshi tarawlardan biri sıpatında qáliplesip barmaqta. Óndirislik quwatlıqlardı keńeytiw, investiciyalıq joybarlardı ámelge asırıw hám zamanagóy texnologiyalardı engiziw nátiyjesinde sanaat kólemleri izbe-iz óspekte.
Milliy statistika komitetiniń dáslepki maǵlıwmatları da 2025-jılı mámleket sanaatında joqarı ósiw pátleri saqlanıp qalǵanın kórsetpekte. Oǵan bola, 2025-jılı Ózbekstanda sanaat ónimleriniń kólemi 1,1 kvadrillion sumdı quradı.
Bul kórsetkish ótken jılǵa salıstırǵanda 6,8 procentke ósiwdi ańlatadı. Xalıqtıń jan basına sanaat ónimlerin islep shıǵarıw kólemi respublika boyınsha 29,1 million sumǵa teń boldı. Bul kórsetkish ekonomikalıq jumıstıń turaqlı ósiwin hám xalıqtıń óndirislik potencialınıń ósiwin sáwlelendiriwshi áhmiyetli indikator bolıp esaplanadı. 2026-jıl 1-yanvar jaǵdayına bola, respublikamızda 59,8 mıń sanaat kárxanaları jumıs alıp barmaqta.
Bul kárxanalar túrli tarawlarda óndiristi ámelge asırmaqta. Toqımashılıq hám kiyim-kenshek sanaatı, azıq-awqat sanaatı, mashina qurılısı hám metallurgiya, ximiya hám farmacevtika sanaatı, qurılıs materialların islep shıǵarıw tarawları solardıń qatarına kiredi.
Sanaat kóleminiń ósiwi tiykarınan óndirislik quwatlıqlardı modernizaciyalaw, investiciyalıq joybarlar, sonday-aq, sociallıq hám ekonomikalıq baǵdarlamalardıń nátiyjeliligine baylanıslı. Bul óz gezeginde ishki bazardı qanaatlandırıw hám eksport potencialın keńeytiwge xızmet etpekte.
Ekspertlerdiń atap ótiwinshe, sanaattıń turaqlı ósiwi ekonomikalıq rawajlanıw, jańa jumıs orınların jaratıw hám respublika ekonomikasın diversifikaciyalaw ushın ayrıqsha áhmiyetke iye.

Sh.Mamaturopova,
ÓzA