Mámleketimiz basshısınıń “Ishki isler uyımlarınıń migraciya hám personallastırıw tarawındaǵı jumısın sanlastırıw arqalı sapa jaǵınan jańa basqıshqa kóteriw ilajları haqqında”ǵı qararı qabıl etildi.
Qararǵa bola, 2026-jıl 1-maydan eksperiment sıpatında Tashkent, Samarqand hám Ferǵana wálayatları hám Qaraqalpaqstan Respublikasında birewden rayon (qala)lıq migraciya hám personallastırıw bólimlerinde ózine-ózi xızmet kórsetiw imkaniyatı jaratılǵan, jasalma intellekt tiykarındaǵı “Aqıllı” migraciya shaqapshaları shólkemlestiriledi.
“Aqıllı” migraciya shaqapshalarında belgilengen mámleketlik xızmetler kórsetiledi. Ishki isler ministrligi tárepinen ózine-ózi kórsetiletuǵın xızmetlerdiń túrleri keńeytip barıladı.
2026-jıl 1-maydan Migraciya hám personallastırıw departamenti hám onıń aymaqlıq basqarmalarına Ózbekstanǵa elektron kiriw vizası tiykarında kirip kelgen sırt el puqaraları hám puqaralıǵı bolmaǵan shaxslardıń elektron vizalarınıń ámel etiw múddetin bir márte 30 kúnge shekem sozıw huqıqı beriledi.
Sırt el puqaralarına Ózbekstan aymaǵında miynet etiw huqıqın beretuǵın tastıyıqlamanı rásmiylestiriw wákilligi Departament hám onıń aymaqlıq basqarmalarına da beriledi.
2026-jıl 1-sentyabrden studentler jataqxanasına jaylasıw boyınsha shártnama dúziw menen bir waqıtta studentlerdi turǵan ornı boyınsha dizimge alıwdıń kompozit tártibi engiziledi.
Qararǵa bola, 2026-jıl 1-fevraldan fizikalıq táreplerge identifikaciyalawshı ID kartalar birinshi márte rásmiylestirilgende onıń chipine kirgiziletuǵın elektron sanlı imza sertifikatı biypul beriledi.
Departament fizikalıq táreplerdiń oraylıq maǵlıwmatlar bazaların qáliplestiriw hám turaqlı jańalap barıw boyınsha wákillikli uyım bolıp esaplanadı.
Departament sırt el puqaraları hám puqaralıǵı bolmaǵan shaxslardıń, sonday-aq, Ózbekstan Respublikası puqaralarınıń jasaw hám turǵan ornı boyınsha dizimge alınǵan mánzili haqqındaǵı maǵlıwmatlardı jámleydi.
Identifikaciyalawshı ID karta seriyası, nomeri, berilgen ornı hám berilgen sánesi menen juwmaqlanıw sánesi haqqındaǵı, Ózbekstan puqaralıǵı haqqındaǵı, Ózbekstan puqaraları, Ózbekstanda turaqlı jasaytuǵın sırt el puqaraları hám puqaralıǵı bolmaǵan shaxslar haqqındaǵı, Ózbekstanǵa mirát etilgen sırt el puqaraları hám puqaralıǵı bolmaǵan shaxslar haqqındaǵı, sonday-aq, olardıń viza múddeti sozdırılǵanlıǵı haqqındaǵı maǵlıwmatlar da Departamentte boladı.
2026-jıl 1-sentyabrden Birden-bir identifikaciyalaw mámleketlik xızmetleri portalı hám mámleketlik xızmetler orayları arqalı sırt elde jasap atırǵan watanlaslar hám olardıń shańaraq aǵzaların Ózbekstanǵa mirát etiw, puqaralıǵı bolmaǵan shaxslardıń biometrikalıq háreketleniw hújjetlerin rásmiylestiriw ushın arza jiberiw xızmetleri kórsetiledi.

N.Abduraimova,
ÓzA