Berdaq atındaǵı Qaraqalpaq mámleketlik akademiyalıq muzıkalı teatrında “Prokurordıń bir kúni” atamasındaǵı spektakl premerası bolıp ótti.
Premeraǵa keń jámiyetshilik hám ǵalaba xabar qurallarınıń wákilleri, tamashagóyler qatnastı.
Bul saxnalıq shıǵarmada jámiyette nızam ústinligi, ádillik hám insan juwapkershiligi sıyaqlı áhmiyetli máseleler kórkem sheshimler arqalı ashıp berildi. Spektakl waqıyaları arqalı bir kún dawamında prokurordıń jumısı, onıń kásiplik minneti, ishki keshirmeleri hám insan táǵdiri aldındaǵı juwapkershiligi tereń hám isenimli túrde sáwlelendirildi. Spektakl tamashagóydi biypárwa qaldırmay, turmıs haqqında pikir júrgiziwge shaqıradı.
Spektakl scenariyiniń avtorı – Dilbar Raxmanova bolıp, ol shıǵarmadaǵı waqıyalardı turmıslıq, ráwan hám tásirsheń usılda jaza alǵan. Saxnalastırıwshı rejissyor, Qaraqalpaqstan Respublikasına xızmet kórsetken artist Marxabay Úsenov shıǵarmanıń ideyasın saxnada sheberlik penen janlandırıp, hár bir obrazdıń xarakterin anıq hám ayqın ashıp beriwge erisken.
Aktyorlardıń atqarıwı, saxnalıq háreketler, muzıka hám dekoraciyalar spektakldiń ulıwma kórkemlik bahasın jáne de arttırdı. Tamashagóyler oynaǵan obrazlarǵa isenip, waqıyalardı ómirdiń ózinde bolıp atırǵanday qabıl etti.
“Prokurordıń bir kúni” spektakli jas áwladta Watandı súyiw hám oǵan sadıqlıq sezimlerin tárbiyalawı menen áhmiyetli.

Qaraqalpaqstan xabar agentligi