Jawǵa tik qaraǵan sadıq insanlar elimiz qalqanı sanaladı. Usı mánide Watandı qorǵaw – shın mánisindegi ullı kásip.
14-yanvar – Watan qorǵawshıları kúni mine usınday márt insanlarǵa húrmet hám izzet kórsetiletuǵın áhmiyetli sáne bolıp esaplanadı. Olar jurt shegaralarında, aspan keńisliginde hám muqaddes wazıypa jolında sergek turıp, tınıshlıǵımızdı támiyinleydi.
Ózbekstan Respublikası Qurallı Kúshleri dúzilgeniniń 34 jıllıǵı hám 14-yanvar – Watan qorǵawshıları kúni múnásibeti menen Qurallı Kúshler mámleketlik muzeyi maydanındaǵı “Watanǵa ant” esteligine gúlsheńber qoyıldı.
Ilajda mámleketlik hám jámiyetlik ǵayratkerler, áskerler, shayır hám jazıwshılar jáne keń jámiyetshilik wákilleri qatnastı.
Bunnan soń, Qorǵanıw ministrliginiń oraylıq apparatında sıylıqlanǵan áskeriy xızmetkerlerge mámleketlik sıylıqtı tapsırıw hám Qurallı Kúshlerde óz kásibiniń sheberi tańlawınıń jeńimpazların sıylıqlaw máresimi bolıp ótti.
Ózbekstan Respublikası qorǵanıw ministri, general-leytenant Shuhrat Xolmuhammedov óziniń shıǵıp sóylegen sózinde milliy armiyamızdıń potencialı, mámleketimiz tárepinen taraw xızmetkerlerin xoshametlew jolında alıp barılıp atırǵan jumıslar, izbe-iz dawam etip atırǵan keń kólemli reformalar hám olardıń nátiyjelerine ayrıqsha toqtap ótti.
Prezidentimizdiń “Ózbekstan Respublikası Qurallı Kúshleri dúzilgeniniń 34 jıllıǵı hám Watan qorǵawshıları kúni múnásibeti menen áskeriy xızmetkerler hám huqıq qorǵaw uyımlarınıń bir topar xızmetkerlerin sıylıqlaw haqqında”ǵı pármanı oqıp esittirildi.
Qorǵanıw ministri óz wazıypasında isenimli hám sadıqlıq penen xızmet etip, múnásip kórilgenlerge mámleketlik sıylıqlardı tapsırdı.
– Maǵan berilgen sıylıq keyingi xızmetlerimizde de joqarı juwapkershilik júkleydi, – dedi “Jasorat” medalınıń iyesi, III dárejeli serjant Alishoh Abdullaev.
Ilajǵa áskeriy xızmetkerler, Qurallı Kúshler veteranları hám keń jámiyetshilik wákilleri qatnastı.

Abdulaziz RUSTAMOV, Sarvar WRMONOV (foto), ÓzA