Qaraqalpaqstan Respublikası Ayrıqsha jaǵdaylar basqarması tárepinen Nókis qalalıq 1-Qutqarıw bóliminde “Watansúyiwshilik aylıǵı” sheńberinde “Xalıq hám armiya bir tán, bir jan!” súreni astında press-tur shólkemlestirildi.
Ilajǵa ǵalaba xabar qurallarınıń wákilleri hám jaslar mirát etilip, tarawda ámelge asırılıp atırǵan ilajlar haqqında keń túrde maǵlıwmatlar berildi.
Atap ótilgenindey, obektlerde hám puqaralardıń jeke menshik turaq jaylarında órttiń hám ayrıqsha jaǵdaylardıń aldın alıw baǵdarında turaqlı túrde úgit-násiyat jumısları alıp barılmaqta. Órt yamasa ayrıqsha jaǵdaylar júz bergende onı saplastırıw boyınsha ámelge asırılatuǵın jumıslardıń tez hám nátiyjeli bolıwı ushın turaqlı túrde oqıw-shınıǵıwları ótkerilip, usınday jaǵdaylarda kerekli bolatuǵın texnikalar hám zárúrli ásbap-úskenelerdiń sazlıǵı támiyinlenbekte.
Qutqarıw bólimleri házirgi waqıtta eń zamanagóy texnikalar hám ásbap-úskeneler menen támiyinlengen. Bólimdegi jeke quram ushın da qolaylı sharayatlar jaratılǵan.
Ilajda ayrıqsha jaǵdaylardı saplastırıwda qollanılatuǵın texnikalar hám ásbap-úskenelerdiń kórgizbesi shólkemlestirilip, qánigeler tárepinen olar tuwralı maǵlıwmatlar berildi. Ámeliy hám kórgizbeli shınıǵıwlar kórsetildi.
Ilaj dawamında qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan txabar agentligi.
M.Habibullaevtıń túsirgen súwretleri.