Búgingi kúnde “bajıxana aymaǵında qayta islew” bajıxana rejimi mámleketimizde jergilikli óndiristi rawajlandırıw, eksport potencialın arttırıw hám jańa jumıs orınların jaratıwda úlken áhmiyetke iye bolmaqta.

Usı rejim imkaniyatlarınan nátiyjeli paydalanıp kiyatırǵan Qońırat hám Xojeli rayonlarında jumıs alıp barıp atırǵan un islep shıǵarıw kárxanalarında bajıxana basqarmasınıń juwapker xızmetkerleri tárepinen úyreniw jumısları alıp barıldı.
Atap aytqanda, “Qońırat un zavodı” akcionerlik jámiyetiniń jumısı menen jaqınnan tanıstı. Bul kárxana házirgi kúnde dán ónimlerin qayta islew arqalı bir kúnde 150 tonna un ónimin islep shıǵarıwdı jolǵa qoyǵan bolıp, 80 puqaranı turaqlı jumıs ornı menen támiyinlegen.
Sonday-aq, jıllıq quwatlılıǵı 50 mıń tonna un ónimin islep shıǵarıw imkaniyatına iye bolǵan “Xojeli un ónimleri” juwapkershiligi sheklengen jámiyetiniń jumısları da úyrenildi. Kárxana tárepinen 2025-jıl dawamında ulıwma bahası 2,1 million AQSh dollarına teń bolǵan 8,4 mıń tonna tayar un ónimleriniń sırt el bazarlarına eksport etiliwine erisilgen.
– Úyreniw procesinde kárxana wákillerine bar óndirislik potencialdan kelip shıqqan halda “bajıxana aymaǵında qayta islew” bajıxana rejimi imkaniyatlarınan jáne de keńirek hám nátiyjeli paydalanıw boyınsha tiyisli usınıslar hám túsinikler berildi, – deydi Bajıxana basqarmasınıń Isbilermenlerdiń jumısın qollap-quwatlaw sektorı bas inspektorı Salamat Dáwenov.
Ámelge asırılıp atırǵan bunday ilajlar jergilikli óndirisshilerdi qollap-quwatlaw, kárxanalarınıń eksport kólemin arttırıw hám aymaqlardıń ekonomikalıq potencialın joqarılatıwǵa xızmet etpekte.

Á.Jiyemuratov,
Qaraqalpaqstan xabar agentligi.