Elimizde infrastukturanı, sonıń ishinde, xalıqtı ishimlik suwı, gaz hám elektr energiyası menen támiyinlewdi jaqsılaw maqsetinde bir qatar ilajlar ámelge asırılmaqta. Ásirese, usı tarawlarda jumıs islep atırǵan jumısshılar ushın jaratılıp atırǵan sharayatlar, jumıs nátiyjeliligin arttırıw baǵdarında ámelge asırılıp atırǵan ilajlardı atap ótiw orınlı.

“Aymaqlıq elektr tarmaqları” AJ tárepinen de filiallardıń materiallıq-texnikalıq bazasın bekkemlewge oǵada úlken itibar qaratılmaqta. Atap aytqanda, Qaraqalpaqstan aymaqlıq filialınıń quramına kiriwshi qalalıq hám rayonlıq elektr támiynatı bólimleri ushın 30 dana «Changan» júk-jolawshı tasıwshı elektromobilleriniń satıp alınıwı tutınıwshılarǵa kórsetilip atırǵan xızmetlerdiń sapasın bunnan bılay da jaqsılaw imkaniyatın beredi.
Nókiste usı avtomobillerdi óz iyelerine tapsırıw máresimi bolıp ótti.
Onda Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanovlar shıǵıp sóylep, paydalanıwǵa tapsırılıp atırǵan usı xızmet transportlarınıń abzallıqlarına toqtap ótip, sońǵı jılları xalıqtı sapalı hám úzliksiz elektr energiyası menen támiyinlew baǵdarında qolǵa kirgizilgen jetiskenliklerdiń tiykarında Prezidentimizdiń tarawdıń rawajlanıwına qaratıp atırǵan turaqlı itibarı turǵanlıǵın qanaatlanıwshılıq penen atap ótti.
Maǵlıwmat ushın atap ótetuǵın bolsaq, qurılıs-ońlaw jumısları ushın 30 dana elektromobil alındı. Olar qala hám rayonlarǵa jiberiledi.

Á.Jiyemuratov,
Qaraqalpaqstan xabar agentligi