Múnásibet

Bizge belgili, sońǵı jılları mámleketimizde mámleketlik hám jámiyetlik turmıstıń barlıq tarawların qamtıp alǵan keń kólemli reformalar ámelge asırılmaqta. Atap aytqanda, ekonomikanı liberallastırıw, xalıqtıń bántligin támiyinlew, insan kapitalın rawajlandırıw, sociallıq qorǵaw sistemasın jetilistiriw, isbilermenlikti qollap-quwatlaw hám mámleketlik basqarıwdı reformalawǵa qaratılǵan ilajlar jańa Ózbekstannıń rawajlanıwınıń bekkem tiykarın jarattı.
Mine, usı reformalardıń logikalıq dawamı sıpatında qabıl etilgen “Ózbekstan – 2030” strategiyası mámleketti orta múddette rawajlandırıwdıń tiykarǵı baǵdarların belgilep berdi. Bul strategiya dúnya ámeliyatında keńnen qollanılıp atırǵan “maqset – háreket – nátiyje” principine tiykarlanıp islep shıǵılǵan bolıp, mámleketlik siyasattıń anıq maqsetlerine erisiwdi támiyinlewge xızmet etpekte.
Sonıń ishinde, “Ózbekstan – 2030” strategiyası sheńberinde turaqlı ekonomikalıq ósiw, bilimlendiriw, medicina hám sociallıq qorǵaw sistemaların túp-tiykarınan jańalaw, ekologiyalıq turaqlılıqqa erisiw, xalıq xızmetindegi ádil hám zamanagóy mámleketti qurıw jáne mámlekettiń suvereniteti hám qáwipsizligin kepillikli támiyinlew tiykarǵı wazıypalar etip belgilendi.
Strategiya sheńberinde ámelge asırılǵan reformalar qısqa waqıt ishinde sezilerli unamlı nátiyjelerdi berdi. Atap aytqanda, kámbaǵallıq dárejesiniń 11 procentten 5,8 procentke túsiwi, jalpı ishki ónim kóleminiń 145 milliard dollarǵa jetkeni, eksport hám sırt el investiciyaları kóleminiń izbe-iz ósiwi mámlekettiń ekonomikalıq potencialı bekkemlenip atırǵanın kórsetpekte. Sonday-aq, jumıssızlıq dárejesiniń azayıwı, turizm tarawındaǵı ósiw hám Ózbekstannıń xalıqaralıq reytinglerdegi abırayınıń jaqsılanıwı ámelge asırılıp atırǵan reformalardıń nátiyjeliligin tastıyıqlaydı.
Sonıń menen birge, ótkerilgen tallawlar “Ózbekstan – 2030” strategiyasında belgilengen ayırım nátiyjelilik kórsetkishleri óz áhmiyetin joǵaltıp atırǵanın kórsetpekte. Sonıń ishinde, ámeldegi 444 kórsetkishtiń belgili bir bólegi wazıypa yamasa tapsırma sıpatında qálipleskeni, ayırımlarında bolsa nátiyjelilik jeterli dárejede sáwlelendirilmegeni strategiyanı qayta kórip shıǵıw zárúrligin talap etpekte.
Bunnan tısqarı, dúnyada júz berip atırǵan globallıq ózgerisler, xalıqaralıq bazarlardaǵı turaqsızlıq, texnologiya hám sanaattıń jedel rawajlanıwı, “jasıl ekonomika”ǵa ótiw, sanlı transformaciya, jasalma intellekt hám kiberqáwipsizlik tarawlarınıń áhmiyetliligi Ózbekstannan pútkilley jańa qatnaslardı talap etpekte. Xalıqtıń sanınıń ósiwi, urbanizaciya processleriniń tezlesiwi, bántlik hám dáramatlar máselesi de strategiyalıq rejelestiriwde esapqa alınıwı zárúr bolǵan áhmiyetli faktorlar bolıp esaplanadı.
Sonıń menen birge, bul Prezident pármanında “Ózbekstan – 2030” strategiyasınıń ámelge asırılıwı ústinen qatań hám sistemalı monitoring ornatıw ayrıqsha áhmiyetke iye bolmaqta. Atap aytqanda, Respublikalıq komissiyaǵa strategiyanıń tolıq, óz waqtında hám sapalı ámelge asırılıwın támiyinlew, barlıq juwapker uyımlardıń jumısın muwapıqlastırıw wazıypası júklendi.
Ádillik ministrligi hám Esap palatası tárepinen normativlik-huqıqıy hújjetler joybarlarınıń óz waqtında islep shıǵılıwı qadaǵalanıwı, Strategiyalıq rawajlanıw hám reformalar agentligi jáne tiyisli shólkemler tárepinen nátiyjelilik kórsetkishlerine erisiw monitoringin jolǵa qoyıw mámleketlik basqarıwda nátiyjelilik hám esap beriwdi arttırıwǵa xızmet etedi.
Sonday-aq, Ministrler Kabineti tárepinen strategiyanıń orınlanıwın hár ay hám hár sherekte sın kózqarastan dodalaw ámeliyatınıń engizilgeni juwapker basshılardıń jeke juwapkershiligin kúsheytedi. Bul bolsa reformalardıń qaǵazda emes, ámelde orınlanıwın támiyinlewge qaratılǵan áhmiyetli qádem bolıp esaplanadı.
Juwmaqlap aytqanda, “Ózbekstan – 2030” strategiyası mámleket rawajlanıwın sapa jaǵınan jańa basqıshqa alıp shıǵıwǵa qaratılǵan kompleksli hám sistemalı baǵdarlama bolıp esaplanadı. Onı global tendenciyalar hám zamanagóy shaqırıqlarǵa sáykes túrde jetilistiriw, nátiyjelilik kórsetkishlerin qayta belgilew jáne qatań monitoring mexanizmlerin engiziw arqalı Ózbekstannıń turaqlı rawajlanıwı, xalıqtıń abadanlıǵı hám xalıqaralıq maydandaǵı básekige shıdamlılıǵın bunnan bılay da arttırıwǵa bekkem tiykar jaratıladı.
Sonlıqtan, parlament aǵzası hám xalıq wákili sıpatında hár bir watanlasımızdı “Mámlekettiń 2030-jılǵa shekem mólsherlengen rawajlanıwınıń tiykarǵı baǵdarları sheńberinde reformalardı izbe-iz dawam ettiriw hám jańa basqıshqa alıp shıǵıwdıń qosımsha ilajları haqqında”ǵı Prezident pármanı jáne 2026-jılǵı Mámleketlik baǵdarlamanı dodalawda óz pikir-usınısları menen belsene qatnasıwǵa shaqıraman.

Gulnoraxon ABDUVOHIDOVA,
Oliy Majlis Nızamshılıq palatasınıń
Miynet, densawlıqtı saqlaw hám sociallıq máseleler boyınsha komitetiniń aǵzası. ÓzA