Qırǵız Respublikasınıń burınǵı prezidenti Almazbek Atambaev barlıq mámleketlik sıylıqlarınan ayırıldı. Tiyisli pármanǵa búgin úlkeniń ámeldegi mámleket basshısı Sadir Japarov tárepinen qol qoyılǵan.

Atap ótiliwinshe, Japarov Bishkek qalası Birinshi may rayonlıq sudınıń 3-iyundegi húkimin orınlaw maqsetinde usı hújjetke qol qoyǵan.
Oǵan bola, A.Atambaev mámlekettiń joqarı sıylıǵı – “Qırǵızstan Qaharmanı” ataǵı, II dárejeli “Manas” hám “Danaker” ordenleri, sonday-aq, “Dank” medalı sıylıǵınan ayırılǵan.
Huqıq qorǵaw uyımlarına olardı keyin ala mámleketlik sıylıqlar fondına tapsırıw ushın alıp qoyıw tapsırıldı.
Maǵlıwmat ornında: Atambaev 2011-jıl dekabrden 2017-jıl noyabrge shekem Qırǵızstan Respublikası prezidenti bolǵan. 2020-jılı ol kriminal shaxs Aziz Batukaevtı nızamsız bosatıw isi boyınsha 11 jıl eki ayǵa erkinen ayırılǵan edi. 2023-jılı burınǵı mámleket jetekshisi koloniyadan bosatıldı hám emleniw ushın sırt elge ketiwge ruqsat berildi. Házir ol sırt elde.
Usı jıldıń 3-iyun kúni Bishkektiń Birinshi May rayonlıq sudı mámleketti tárk etken Almazbek Atambaevtı sırttan 11 jıl 6 ayǵa erkinen ayırıw hám múlkin konfiskaciyalaw haqqında qarar shıǵardı. Burınǵı prezident korrupciya, ǵalabalıq tártipsizlikler shólkemlestiriw, sonday-aq, Qoytash awılındaǵı jer maydanların nızamsız qolǵa kirgiziwde ayıplı dep tabılǵan.

Ó.Alimov, ÓzA