Házirgi kúnleri elimizde órt qáwipsizliginiń bir aylıǵı shólkemleskenlik penen ótkerilmekte. Aylıq sheńberinde, respublikamızdıń gaz támiynatı tarawı qánigeleri jámiyetlik orınlarda bolıp, tábiyǵıy gazden qáwipsiz paydalanıw boyınsha arnawlı reyd hám úgit-násiyat jumısları turaqlı túrde ámelge asırılmaqta. Bul ilajdı ótkeriwden tiykarǵı maqseti tutınıwshılardıń tábiyǵıy hám suyıltırılǵan gazden durıs hám qáwipsiz paydalanıwın támiyinlew bolıp esaplanadı. Atap aytqanda usınday reyd filial qánigeler tárepinen Tórtkul diyqan bazarında jaylasqan awqatlanıw orınlarında ótkerilip, onda ayırım awqatlanıw orınları suyıltırılǵan gaz ballonlardan paydalanıp kiyatırǵanlıǵı anıqlandı hám reyd dawamında 10 dana talapqa juwap bermeytuǵın gaz ballonlar jıynap alındı. Ilajda tutınıwshılarǵa gaz ballonlarınan belgilengen qaǵıydaǵı muwapıq hám qáwipsiz paydalanıw tártipleri haqqında túsinikler berildi.
– Respublikamız boyınsha gaz támiynatı kárxanası tárepinen tek ǵana alıs aymaqlardaǵı suyıltırılǵan gazge beyimlestirilgen xojalıqlar hám mektepke shekemgi bilimlendiriw mákemeleri suyıltırılǵan gaz benen támiyinlenbekte, – deydi «Hududgaz Qaraqalpaqstan» gaz támiynatı filialı suyıltırılǵan gaz támiynatı bólimi baslıǵı Ruslan Ibragimov. – Awqatlanıw orınları gaz ballonlar menen támiyinlenbeydi. Búgingi kúni respublikamız boyınsha 100 489 jeke xojalıq hám 121 Mektepke shekemgi bilimlendiriw shólkemine tiyisli gaz ballonlar tarqatıladı.
Bul baǵdardaǵı ilajlar respublikamızdıń basqa da qala hám rayonlarındaǵı awqatlanıw orınlarında alıp barılmaqta.

Adilbay Orazov,
Qaraqalpaqstan xabar agentligi sholıwshısı.