Ájiniyaz atındaǵı Nókis mámleketlik pedagogikalıq institutında tariyx fakultetiniń tariyx, milliy ideya, ruwxıylıq tiykarları hám huqıq tálimi baǵdarlarınıń 1-kurs studentlerinen ibarat 7 komanda Ózbekstan Respublikası Konstituciyası qabıl etilgeniniń 33 jıllıǵı múnásibeti menen «Siz nızamdı bilesiz be?» tańlawında óz-ara bellesti.

Ilajǵa instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov qatnasıp, jıynalǵanlardı Ózbekstan Respublikası Konstituciyası kúni bayramı menen qutlıqladı hám qatnasıwshılarǵa áwmet tiledi.
Mámleketimizde ámelge asırılıp atırǵan keń kólemli reformalarda student-jaslardıń belsene qatnasıwın támiyinlew, joqarı mánawiyatlı, huqıqıy jaqtan sawatlı, erkin pikirleytuǵın jaslardı tárbiyalaw, adamzatqa jat bolǵan illetlerge qarsı gúresiw immunitetin qáliplestiriw, bos waqıtların mazmunlı ótkeriw, sonday-aq, jaslardıń jańalanǵan Konstituciya boyınsha bilimlerin bahalaw jáne xoshametlew maqsetinde shólkemlestirilgen tańlawda «Jas demokratlar», «Jas progressler», «Adolat», «Yusticiya», «Femida», «Demokratlar», «Turan» komandaları sálemnama, soraw-juwap hám saxnalıq kórinis sıyaqlı shártler boyınsha ózleriniń konstituciyalıq bilimlerin, kónlikpelerin sınaqtan ótkerdi.
Komandalardıń hár bir shárt boyınsha saxnalıq shıǵıwların, sorawlarǵa bergen juwapların tóreshiler quramı aǵzaları bahalap bardı.
Tańlaw juwmaǵında jeńimpazlar hám sıylı orın iyeleri anıqlandı. Barlıq qatnasıwshı komandalarǵa institut rektoratı, kásiplik awqamı komiteti tárepinen diplom hám sawǵalar tapsırıldı.
– Búgin institutımızda bas nızamımız qabıl etilgeniniń 33 jıllıǵı múnásibeti menen ótkerilgen aǵartıwshılıq ushırasıw jarqın hám este qalarlıq boldı. Ustazlarımız hám miymanlar Konstituciya hám onıń mazmun-mánisi haqqında oǵada qızıqlı hám paydalı pikirlerdi bildirdi. Bul bolsa bizge bas nızamımızda sáwlelengen huqıqlarımızdı jáne bir márte ańlaw imkaniyatın berdi, – deydi Milliy ideya, ruwxıylıq tiykarları hám huqıq tálimi baǵdarınıń 1-kurs studenti, tańlaw jeńimpazı Gúlbaxar Yusupbekova.
Institutta Konstituciya kúnine arnalǵan ilajlar dawam etpekte.

Qaraqalpaqstan xabar agentligi