26-29-noyabr kúnleri Surxandárya wálayatında eresekler hám hayal-qızlar arasında Qum gúresi boyınsha Ózbekstan chempionatı bolıp ótti.

Jarısqa elimizdiń barlıq aymaqlarınan, sonıń ishinde Qaraqalpaqstan Respublikası saylandı komandası aǵzaları da qatnasıp, jeńimpazlıq ushın gúres júrgizdi.
Keskin ótken bellesiwler sońında, 70 kg salmaqta qatnasqan Azada Medetbaeva barlıq qarsılasların jeńip shıǵıp, Ózbekstan chempionı ataǵına miyasar boldı. 87 kg salmaqta gúreske túsken Larisa Tórejanovaǵa bolsa, finalda biraz áwmet jetispedi hám gúmis medal menen sıylıqlandı.
48, 52 hám +87 kg salmaqta bellesiwlerge kirisken, Shaxrizada Romanova, Gúlzabira Tilewimbetova hám Sabrina Uzaqbaevalarǵa bolsa, qola medalı nesip etti.
Al, erler arasında ótkerilgen bellesiwde qatnasqan Jasur Shaymuratov 73 kg salmaqta sıylı úshinshi orındı jeńip alıwǵa eristi.
Jeńimpaz palwanlarımızdı jarısqa tájiriybeli trenerlerden Shıńǵıs Biyimbetov, Jamshid Turabaev, Qajımuxan Qdırbaev hám Nókisbay Daniyarovlar tayarladı.

Adilbay Orazov,
Qaraqalpaqstan xabar agentligi sholıwshı