Saudiya Arabstanında ótkerilip atırǵan VI Islam tileklesligi oyınlarınıń on ekinshi kúni de Ózbekstan sport delegaciyası ushın tabıslı kelip, sportshılarımız tárepinen 1 altın, 2 gúmis hám 1 qola medalı qolǵa kirgizildi.

Ásirese, olar arasında hayal-qızlar gúresi boyınsha mámleketimiz saylandı komandasınıń aǵzası Aqteńge Kewnimjaeva 50 kg salmaq kategoriyasında barlıq qarsılasların jeńip shıǵıp, altın medal iyesine aylanǵanı, barlıq sport jankúyerlerin quwanıshqa bóledi.
Jarıstıń dáslepki basqıshında aljirli CHebila CHeymanı 6:1, ekinshi basqıshta tunisli CHahzared Ayachi hám yarım finalda ázerbayjanlı Elnura Mammadovani 10:0 esabında jeńip shıqqan Aqteńge chempionlıq ushın bellesiwde nigeriyalı Meisinnei Jenezis penen keskin gúres júrgizdi.
Qızıqlı ótken bellesiwdiń birinshi partiyasında óziniń belsendiligin kórsetken jerlesimiz 1:0 esabında jeńgen bolsa, ekinshi bólimde nigeriyalı palwan keskin hújimlerge ótip, 1 upay alıwǵa eristi.
Álbette, bul upay arqalı ol final bellesiwin óziniń paydasına sheshiwi múmkin edi. Bunı jaqsı túsingen Aqteńge bellesiw juwmaqlanıwına 1 minut qalǵanında Meisinnei Jeneziske qarsı keskin usıllar qollanıp, onı jıǵıwǵa eristi hám 4 upaydı qolǵa kirgizdi.
Bunnan keyin nigeriyalı palwan da taǵı da upay alıw ushın hújimge ótti. Biraq, hayal-qızlar gúresi boyınsha elimiz maqtanıshı bolǵan Aqteńge Kewnimjaeva qarsılasına imkaniyat bermedi hám VI Islam tileklesligi oyınlarınıń chempionına aylandı.
Sonday-aq, usı kúngi jarısta belgili sablyashı Musa Aytmuratov ta bellesiwlerge kirisip, dáslepki basqıshta iranlı Muhammad Firuzabadke jeńilip qaldı.
Jarıstıń on ekinshi kúngi bellesiwlerinen soń mámleketimiz sport delegaciyası 26 altın, 30 gúmis hám 26 qola medaldı qolǵa kirgizip, ulıwma komandalıq esapta Túrkiyadan soń ekinshi orındı iyelep kelmekte.

Adilbay Orazov,
Qaraqalpaqstan xabar agentligi sholıwshısı.