Shegirtke hám tut zıyankesine qarsı gúresiw jumısların ámelge asırıwda gúzgi “raskopka” – qazıp kóriw jumısları áhmiyetli ilajlardıń biri bolıp esaplanadı. Bul ilajdıń tiykarǵı maqseti – shegirtke, tut zıyankesi hám basqa da karantin áhmiyetine iye zıyankeslerdiń qıslap qalıw basqıshların anıqlaw, olardıń tarqalıw aymaqların belgilew hám kelesi vegetaciya máwsiminde nátiyjeli gúresiw ilajların rejelestiriwden ibarat.

Gúzgi qazıw barısında topıraqtıń hár qıylı tereńliklerinen úlgi alınıp, ondaǵı zıyankeslerdiń máyekleri, qabıqları, lichinkaları yamasa basqa rawajlanıw basqıshları arnawlı laboratoriya jaǵdayında izertlenedi. Bul baqlawdıń nátiyjeleri tiykarında shegirtke populyaciyasınıń kelesi jıldaǵı qáwip dárejesi, tut zıyankesi hám basqa da zıyanlı jánliklerdiń tarqalıw itimalı boyınsha anıq boljawlar dúziledi.
Qazıw jumısları Qaraqalpaqstan Respublikasınıń barlıq shegirtke tarqalıw qáwpi bar aymaqlarında basqıshpa-basqısh alıp barıldı. Anıqlanǵan maǵlıwmatlar keyin ala báhárgi ximiyalıq hám agrotexnikalıq islew jumısların rejelestiriw, zıyankeslerdiń keń tarqalıwınıń aldın alıw hám awıl xojalıǵı eginleriniń ónimdarlıǵın saqlap qalıw ushın áhmiyetli bolıp esaplanadı.
Gúzgi qazıw jumısları tek ǵana zıyankesler populyaciyasın bahalawda emes, al kelesi jılǵı shegirtke hám tut zıyankesi qáwpin azaytıwda áhmiyetli basqısh bolıp esaplanadı.

Qaraqalpaqstan xabar agentligi