Búgin Nókis qalasınıń orayında ornatılǵan Ózbekstan hám Qaraqalpaqstan Respublikalarınıń mámleketlik bayraqları janında «Ózbekstan Respublikasınıń mámleketlik bayraǵı haqqında»ǵı Nızamı qabıl etilgen kún múnásibeti menen bayram ilajı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, xalqımızdı bayram múnásibeti menen Qaraqalpaqstan Respublikası Joqarǵı Keńesi hám Ministrler Keńesi atınan qutlıqladı.
Atap ótilgenindey, elimiz bayraǵı jaqsılıq, danıshpanlıq, páklik, sadıqlıq, gózzallıq, tınıshlıq, jańalanıw sıyaqlı sezimlerdi ózinde jámlegeni menen áhmiyetli sanaladı. Solay eken, elimiz bayraǵın kóz qarashıǵınday qásterlep-saqlaw, onı ulıǵlaw hám bálentlerge kóteriw – hár birimiz ushın ana Watan aldındaǵı perzentlik parızımız bolıp esaplanadı.
Sońǵı jılları elimiz bayraǵı astında xalqımız turmısında, insanlardıń ruwxıy dúnyasında úlken ózgerisler menen jańalanıwlar júz bermekte. Onda, Prezidentimizdiń ideyaları, baslap bergen iygilikli isleri, belgilep bergen áhmiyetli wazıypaları turmısımızda ayrıqsha orın iyeleydi. Búgingi kúnde abadan turmısımızdı támiyinlew jolında elimizdiń barlıq aymaqları qatarında Qaraqalpaqstan ushın da shın mánisinde rawajlanıwlar, jańalanıwlar dáwiri sıpatında úlken itibar qaratılıp atırǵanlıǵı bunıń ayqın mısalı bola aladı.
Saltanatlı ilajda mine usı iygilikli isler ayrıqsha atap ótildi.
– Búgin elimizde úlken bayram. Institutımızdaǵı professor-oqıtıwshılar hám student-jaslar menen tań azannan paytaxtımız orayındaǵı bayraǵımız jelbiregen maydanǵa kóterińki keypiyatta jıynaldıq. Házir hámmemizdiń kewil-keypiyatımız joqarı. Bayraǵımız xalıqaralıq maydanlarda, rásmiy delegaciyalardıń sırt ellerge saparları waqtında, xalıqaralıq shólkemlerde, konferenciyalarda, dúnya júzilik kórgizbelerde, sport jarıslarında bálent jelbiremekte hám bizge úlken kúsh-jiger baǵıshlamaqta, – deydi Qaraqalpaqstan awıl xojalıǵı hám agrotexnologiyalar institutınıń tyutorı A.Qurbanova.
Bayraq ózinde pútkil Ózbekstan xalqınıń ázeliy tilek-umtılısları, erk-ıqrarı, xalqımızǵa tán miymandoslıqtı sáwlelendirgen. Mámleketlik bayraqtıń mámleketlik mákeme hám shólkemler, oqıw orınları, Ózbekstan aǵza bolǵan xalıqaralıq shólkemler, sırt ellerdegi elshixana hám turaqlı wákilxanalardıń aldında jelbirep turıwı, hár qıylı bayram saltanatlarında, mámleketimiz wákilleri qatnasıp atırǵan xalıqaralıq kólemdegi siyasiy, mádeniy-aǵartıwshılıq ilajlarda, sport jarıslarında watanımızdıń abıray-mártebesi, xalqımızdıń maqtanıshın ayqın sáwlelendirip, kewillerdi tolqınlandıradı.
Mámleketlik belgiler bárqulla muqaddes hám ullı bolıp, ol xalıqtıń ótmishi, búgini hám keleshegin ózinde jámlegen watannıń simvolı esaplanadı.
Ózbekstan Respublikası Mámleketlik bayraǵı elimiz aymaǵında áyyemgi waqıtta bar bolǵan mámleketler menen tariyxıy baylanıstı ańlatadı hám respublikanıń milliy-mádeniy dástúrlerin ózinde jámleydi.
Joqarı dárejede shólkemleskenlik penen ótkerilgen ilaj kórkem-óner tarawı wákilleriniń koncert baǵdarlaması menen dawam etti.

Qaraqalpaqstan xabar agentligi