18-noyabr – Ózbekstan Respublikasınıń «Mámleketlik bayraǵı haqqında»ǵı nızamı qabıl etilgen kún. Usı sáne múnásibeti menen Qaraqalpaqstan medicina institutında saltanatlı ilaj bolıp ótti.

Ilaj mámleketlik gimnler menen baslandı. Oǵan huqıq qorǵaw uyımı xızmetkerleri, instituttıń professor-oqıtıwshıları, tyutorlar hám student-jaslar qatnastı.
Onda Qaraqalpaqstan Respublikası prokuraturası bólim prokurorı E.Adilov, instituttıń Ózbek tili, tiller hám jámiyetlik pánler kafedrasınıń docenti T.Pirniyazova, Jaslar menen islesiw bóliminiń baslıǵı A.Ajievler shıǵıp sóylep, ilaj qatnasıwshıların bayram menen qızǵın qutlıqladı. Shıǵıp sóylewshiler tárepinen atap ótilgenindey, 1991-jıldıń 18-noyabr kúni tastıyıqlanǵan mámleketlik bayraq – ǵárezsizligimiz, milliy qádiriyatlarımız hám xalqımızdıń iygilikli umtılıslarınıń ayqın tımsalı bolıp esaplanadı. Búgin Ózbekstan bayraǵı xalıqaralıq maydanlarda, diplomatiyalıq wákilxanalarda hám abıraylı jarıslarda jelbirep, Watanımızdıń abırayı hám xalqımızdıń maqtanıshın bildirip kelmekte. Mámleketlik nıshanlar – ótmishimiz, búginimiz hám keleshegimizdiń muqaddes tımsalı.
Saltanatlı keshede student-jaslar da shıǵıp sóylep, mámleketlik bayraq boyınsha ózleriniń jıllı pikirlerin bildirdi.

Qaraqalpaqstan xabar agentligi