Ózbekstan Respublikası Mámleketlik bayraǵı qabıl etilgeniniń 34 jıllıǵı múnásibeti menen Májbúriy orınlaw byurosı Qaraqalpaqstan Respublikası basqarması tárepinen «Bir el, bir Watan, bir bayraq» súreni astında ruwxıy-aǵartıwshılıq ilaj shólkemlestirildi.

Ilajdı basqarma baslıǵınıń orınbasarı V.Erniyazova ashıp, jıynalǵanlardı qutlı sáne – Mámleketlik bayraq qabıl etilgen kún menen qutlıqladı. Ol óziniń shıǵıp sóylegen sózinde bayraǵımızdıń milliy maqtanısh hám ǵárezsizlik tımsalı sıpatında tutqan ornına, onıń hár bir watanlasımızdıń qálbindegi áhmiyetine toqtap ótti.
Májiliste Berdaq atındaǵı Qaraqalpaq mámleketlik universitetiniń yuridika ilimleri doktorı S.Tańirbergenov qatnasıp, mámleketlik bayraqtıń jaratılıw tariyxı, simvolikalıq mánisi hám búgingi kúndegi áhmiyeti haqqında pikir-usınıslar bildirdi.
Atap ótiliwinshe, Mámleketlik bayraǵımız xalqımızdıń ásirlik arzıw-niyetleri, miynet súygishligi, miymandoslıǵı hám iygilikli maqsetlerin ózinde jámlegen muqaddes tımsal bolıp esaplanadı. Búgingi kúnde ol elimizdegi barlıq mámleketlik uyımlar, bilimlendiriw mákemeleri, xalıqaralıq shólkemler hám sport jarıslarında maqtanısh penen jelbirep, elimizdiń abırayın, xalqımızdıń maqtanıshın bildirip kelmekte.
Ilaj dawamında qatnasıwshılar qızıqtırǵan sorawlarına qánigeden juwap aldı.

Qaraqalpaqstan xabar agentligi