Berdaq atındaǵı Qaraqalpaq mámleketlik akademiyalıq muzıkalı teatrında «Medicina xızmetkerleri kúni» múnásibeti menen bayram keshesi bolıp ótti.

Ilajda Qaraqalpaqstan Respublikası Joqarǵı Keńesiniń Baslıǵı A.Orınbaev shıǵıp sóylep, taraw pidayıların bayram múnásibeti menen qızǵın qutlıqladı.
Atap ótilgenindey, sońǵı jıllarda Prezidentimiz tárepinen tarawǵa baylanıslı bir qatar párman hám qararlar qabıl etildi. Zamanagóy medicinalıq mákemeler qurıldı. Tarawdıń materiallıq-texnikalıq bazası bekkemlenip, eń shetki aymaqlardaǵı medicina mákemelerin tájiriybeli kadrlar menen támiyinlewge ayrıqsha itibar qaratılmaqta.
Ásirese, bul baǵdarda taraw xızmetkerleri ushın Qaraqalpaqstanda kóplegen imkaniyatlar jaratılıp, xalqımızdıń salamatlıǵın bekkemlew, medicinalıq xızmet kórsetiw sapa jaǵınan jańa basqıshqa alıp shıǵılmaqta.
Ótkerilgen bayram saltanatında Qaraqalpaqstan Respublikası Joqarǵı Keńesi Prezidiumınıń qararı menen tarawda pidayılıq penen jemisli miynet etip atırǵan bir qatar medicina tarawı xızmetkerleri sıylıqlandı.
Bayram saltanatı kórkem óner hám mádeniyat xızmetkerleri tárepinen tayarlanǵan koncert baǵdarlaması menen dawam etti.

Qaraqalpaqstan xabar agentligi