Filippinge bastırıp kelgen “Kalmaegi” dúbeleyi aqıbetinde 66 adam qaytıs boldı, 26 adam biydárek joǵalǵan. Bul haqqında rásmiylerge súyenip, The Guardian xabar berdi. 430 mıńnan aslam xalıq óz úylerin taslap ketiwge májbúr bolǵan.

Zıyan kólemin tekserip atırǵan áskeriy vertolyot qulap túsip, 6 adam qaytıs bolǵan. Qalǵanları bolsa suw tasqınları, tereklerdiń qulawı hám imarat wayranshılıqları astında qalıp qurban bolǵan.
Norvegiya patshalıq policiya basqarması Rossiya menen 198 kilometrlik shegaranı bekkemleydi. Bir qatar shegara uchastkalarında tosıqlar hám baqlaw kameraları ornatıladı. Mámleket arqasındaǵı Syor Varanger kommunasında jaylasqan burınǵı Skafferxullet shegara punkti hám rásmiy Storskog qadaǵalaw-ótkeriw punktinde qáwipsizlik kúsheytiledi. Tosıqlardan tısqarı shegaranı qadaǵalaw ushın zamanagóy sensorlar hám baqlaw kameraları ornatıladı. Finnmark okrugi policiya baslıǵı Ellen Katrine Xettanıń aytıwınsha, mámleket shegarasınıń ayırım bólimlerinde dronlardan paydalanıw “áhmiyetli boladı”.
Belgiyanıń arqa-shıǵısında NATOǵa qaraslı Kleyn Brogel aviabazası janında belgisiz dronlar ushıwı baqlandı. Jergilikli xalıq 4-noyabr kúni keshte aviabaza átirapında keminde altı drondı kórgen. Tastıyıqlanbaǵan maǵlıwmatlarǵa bola, Kleyne Brogel aviabazası Evropada Amerika yadro quralları saqlanatuǵın orınlardan biri esaplanadı. Policiya eki drondı dizimge alǵan.
Rossiya Ishki isler ministrligi sırt ellilerdiń mámleketten shıǵıp, qayta kiriw arqalı migraciya statusın jańalaw ámeliyatına shek qoydı. Endi shetke shıǵıp ketiw ruqsat etilgen qalıw múddeti dawamlılıǵın nollestirmeydi. Bul haqqında “TASS” xabar berdi. Ministrliktiń atap ótiwinshe, kóplegen sırt el puqaraları Rossiyadan shıǵıp ketip, qayta kiriw arqalı migraciyalıq statusın jańalaw yamasa qalıw múddetin sozıw múmkin, dep nadurıs oylaydı. Vizasız tártipte Rossiyaǵa kiriwshiler mámlekette maksimal bir jılda 90 kún qalıwı múmkin.
AQShtıń Kentukki shtatında júk tiyelgen MD-11 samolyotı hawaǵa kóterilgeninen kóp ótpey, qulap tústi. Bul haqqında CNN xabar berdi. Málim etiliwinshe, samolyot UPS kompaniyasına tiyisli bolǵan. Ol Luisvilldegi Muhammad Ali xalıqaralıq aeroportı janında apatshılıqqa ushıraǵan. Hádiysege samolyot dvigateliniń janıp ketiwi sebep bolǵanlıǵı boljanbaqta. Samolyot qulaǵan jerde órt kelip shıǵıp, aspanǵa qara tútin kóterilgen.

Iroda Jwraeva, Uluǵbek Twxtaev (video), ÓzA