Berdaq atındaǵı Qaraqalpaq mámleketlik universitetiniń jurnalistika kafedrası studentlerge ámeliy kónlikpelerdi úyretiw maqsetinde, bir qatar jańa baslamalardı ámelge asırmaqta.

Atap aytqanda, kafedranıń assistent oqıtıwshısı M.Temirbaeva ózine biriktirilgen 5-kurs sırtqı tálim jurnalistika qánigeligi studentleri menen “Jaslar TV” telekanalında boldı. Bul ilajlar ásirese, “Kásip iyesi” dual tálim shártnaması tiykarında ámelge asırılıwı menen ayrıqsha itibarǵa ılayıq. Ótkerilgen joybar studentlerge tek ǵana teoriyalıq bilimler emes, al ámeliy tájiriybe toplaw, olardı jurnalistika tarawında óz kásibin tolıq iyelewine imkaniyat jaratadı. “Kásip iyesi” dual tálimi studentler ushın ámeliy tájiriybe alıw hám kásiplik bilimlerdi bekkemlewde áhmiyetli rol atqaradı. Bunda jurnalistika kafedrası hám “Jaslar TV” telekanalı menen birgelikte, bolajaq jurnalistler ushın haqıyqıy jurnalistika processlerin úyretiw maqsetinde túrli seminarlar, ashıq sabaqlar shólkemlestirip kelmekte. Ilajlar dawamında studentler maqala jazıw, intervyu alıw, analitikalıq hám jurnalistlik tekseriw ótkeriw, gazetada islew procesin de ámeliyatta óz kózleri menen kórdi. Bul birge islesiw qaraqalpaq filologiyası hám jurnalistika fakulteti studentleriniń jurnalistika tarawındaǵı bilim hám kónlikpelerin jáne de arttırıw hám olardı ámeliyatta bekkemlewde áhmiyetli orın tutadı.
– “Jaslar TV” telekanalı menen birge islesiw, studentlerge tek ǵana jurnalistika tiykarların úyreniwge járdem berip qoymastan, al olardı jurnalist sıpatında haqıyqıy jumıs islewge tayarlaydı, – deydi jurnalistika kafedrasınıń assistent oqıtıwshısı M.Temirbaeva. – Álbette, bunday ilajlar jas jurnalistlerdiń kreativ pikirlewi hám professionallıǵın rawajlandırıwǵa xızmet etedi.

Qaraqalpaqstan xabar agentligi