Ellikqala rayonındaǵı “Aqshakólshi Reyimbergen” fermer xojalıǵında Prezidentimizdiń 2024-jıl 30-dekabrdegi PQ-465-sanlı qararında belgilengen wazıypalardı orınlawǵa qaratılǵan ámeliy seminar bolıp ótti.

Ilajda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev, Ósimlikler karantini hám qorǵaw agentliginiń baslıǵı R.Sherbaev, tarawǵa qánigelesken qánigeler hám fermer xojalıqlarınıń basshıları qatnastı.
Seminar dawamında rayonda bar jer resurslarınan nátiyjeli paydalanıw, atız shetleri esabınan qosımsha maydanlardı ózlestiriw, kollektor-drenaj tarmaqları átiraplarınan nátiyjeli paydalanıw, eksportqa baǵdarlanǵan egin túrlerin egiw, zúráátlilikti arttırıwǵa qaratılǵan agrotexnikalıq ilajlar boyınsha pikir-usınıslar bildirildi. Sonday-aq, qıytaq jerlerinen aqılǵa muwapıq paydalanıw, xalıqtıń ózin-ózi azıq-awqat ónimleri menen támiyinlewdi kúsheytiw, bos maydanlarda qosımsha ónim alıw máseleleri talqılandı.
Ushırasıwda qatnasıwshılarǵa ámeliy usınıslar berilip, qararda názerde tutılǵan wazıypalardı rayonda basqıshpa-basqısh hám sistemalı ámelge asırıw boyınsha anıq ilajlar belgilendi.

Qaraqalpaqstan xabar agentligi