Hár bir millettiń milliy kórkem óneri onıń ǵáziynesi bolıp esaplanadı. Ol keshe yamasa búgin emes, uzaq tariyxtan qáliplesip keledi. Sonıń ushın da tap bayraq sıyaqlı ol da sol xalıqtıń belgisi sıpatında kórinedi. Biziń mine, usınday milliy kórkem ónerimiz bul – maqam.

Jáhán muzıkasında hár qıylı atqarıw jolları bolıp, hár biri óz usılı, quramalılıǵı menen bir-birinen ajıralıp turadı. Mısalı, Hind ragası, Ázerbayjan muǵamı hám basqalar. Tábiyǵıy, kórkem óner sheberleri tek ǵana óz tilinde emes, al basqa tillerde qosıq aytıw boyınsha da ózlerin sınap kóredi. Bunda ózge millettiń tikkeley mádeniyatı, qalaberse, milliy kórkem óneriniń atqarıw sheberligin úyreniw úlken áhmiyetke iye.
-Biziń kórkem óner sheberlerimiz, ásirese, jaslar, qálegen tilde sheberlik penen qosıq atqara aladı. Muǵom hám raganı, túrk hám iran tilin, hátteki, Evropa kórkem óner mektebiniń shıǵarmaların da joqarı dárejede atqaratuǵın talantlı atqarıwshılarımız barshılıq.
Biraq biziń maqamımızdı hesh bir xalıq kórkem óner ǵayratkeri jetilisip atqara almaydı. Bul bolsa onıń qanshelli quramalı hám tartımlı ekenligin bildiredi, – deydi Ózbekstan xalıq artisti Abduhoshim Ismoilov.
Solay bolsa da, búgingi kúnde jaslarımızdıń maqamǵa bolǵan múnásibeti biraz ózgergendey. Álbette, hár bir dáwirdiń óz qosıǵı, súyikli kórkem óner iyesi boladı. Biraq, dáreje máselesi házirgi kórkem ónerimizdiń awırıwlı noqatı desek, aljaspaǵan bolamız.
Milliy kórkem ónerimizdiń keleshegi mámleketimiz basshısınıń itibarında ekeni adamdı quwandıradı. Onıń xalıqaralıq kólemde de abırayın jáne de arttırıw, jaslar qálbinde maqamǵa bolǵan súyispenshilikti qáliplestiriw maqsetinde Prezidentimizdiń baslaması menen xalıqaralıq maqam festivalları ótkerilip kelinbekte. Sonıń nátiyjesinde kóplegen talantlar ashılıp, ustazlardıń miyrası jas áwladqa múnásip úgit-násiyatlanbaqta.

Sherbek Islomov, ÓzA