Kekselerdi sociallıq qollap-quwatlaw, dem alıs waqıtların qızıqlı hám mazmunlı shólkemlestiriw jáne xalıqtıń ishki turizm baǵdarlarında belsene qatnasıwın xoshametlew maqsetinde usı jıldıń 1-30-noyabr kúnleri mámleketimizde “Kekseler ushın turizm aylıǵı” ótkerilmekte. Bul haqqında Ekologiya ministrligi janındaǵı Turizm komiteti málim etti.

Bul baslama sheńberinde jaylastırıw quralları, transport xızmetleri, mádeniy miyras obektleri hám muzeylerde bir qatar shegirmeler engiziledi. Atap aytqanda, respublika boylap jumıs alıp barıp atırǵan miymanxana hám dem alıw orınlarınıń xızmetlerine 20 procentke shekem ıqtıyarıy shegirmeler ámel etedi.
“Uzbekistan Airways” aviakompaniyası 60 jastan asqan er adamlar hám 55 jastan asqan hayallar ushın barlıq ekonom klasstaǵı ishki reys biletlerine 15 procentke shekem shegirme usınadı. Usınıs 2025-jıl 1-30-noyabr kúnleri aralıǵında ámel etedi.
Sonday-aq, “Ózbekstan temir jolları” kompaniyası usı kategoriyadaǵı puqaralar ushın barlıq ishki jónelislerdegi poezd biletleriniń tarif bólegine 20 procent shegirme járiyalaǵan (“Afrosiyob” tezjúrer poezdlarınan tısqarı).
Mádeniy miyras agentligi qaramaǵındaǵı mámleketlik muzeyler hám mádeniy miyras obektlerine kiriw biletleri ushın 10 procentke shekem, “Vaqf” qayırqomlıq jámiyetlik fondı qaramaǵındaǵı zıyarat orınlarına bolsa 20 procentke shekem shegirmeler engizilgen.
Sayaxat dawamında qáwipsizlik hám sanitariyalıq-gigienalıq qaǵıydalarǵa qatań ámel etiw usınıs etiledi.

M.HOJIAKBAROVA,
ÓzAnıń xabarshısı