Qaraqalpaqstan Respublikası Pedagogikalıq sheberlik orayında “Mektepke shekemgi bilimlendiriwden paydalanıw imkaniyatların keńeytiw” joybarı sheńberinde úsh kúnlik seminar-trening óz jumısın basladı.

Ilajdıń tiykarǵı maqseti – mektepke shekemgi bilimlendiriwdiń sapasın arttırıw, sistemada jumıs alıp barıp atırǵan qánigelerdiń kásiplik potencialın bekkemlew hám aldınǵı sırt el tájiriybelerin ámeliyatqa engiziwden ibarat.
Seminar-treningti oray direktorı wazıypasın waqtınsha atqarıwshı B.Iztileuov ashıp berdi.
Ilajda Qaraqalpaqstan Respublikası Mektepke shekemgi hám mektep bilimlendiriwi ministrliginiń wákilleri, sonday-aq, UNICEFtiń erte rawajlanıw hám mektepke shekemgi bilimlendiriw máseleleri boyınsha qánigeleri hám UNICEF xalıqaralıq eksperti Kristian Fabbi qatnaspaqta.
Seminar Islam rawajlanıw bankiniń baslaması menen ámelge asırılıp atırǵan “Mámleketlik emes mektepke shekemgi bilimlendiriw mákemeleri tarmaǵın mámleketlik-jeke menshik sheriklik tiykarında rawajlandırıw” joybarı, UNICEF hám Mektepke shekemgi hám mektep bilimlendiriwi ministrligi menen birgeliktegi “Mektepke shekemgi bilimlendiriwden paydalanıw imkaniyatların keńeytiw” joybarı, “Pedagog hám basshılardıń potencialın bekkemlew, kásiplik tayarlaw hám qánigeligin arttırıw sistemasın reformalaw” joybarı sheńberinde shólkemlestirilgen.
Úsh kún dawam etetuǵın seminar-trening procesinde qatnasıwshılar ushın mektepke shekemgi bilimlendiriwdiń sapasın arttırıwǵa qaratılǵan teoriyalıq hám ámeliy sabaqlar shólkemlestiriledi.

Qaraqalpaqstan xabar agentligi