Bizge belgili, mámleketimiz basshısı Evropa keńesiniń Prezidenti Antoniu Koshta hám Evropa komissiyasınıń Prezidenti Ursula fon der Lyayenniń mirát etiwine bola 23-24-oktyabr kúnleri rásmiy sapar menen Bryussel qalasında boladı.

Sapar baǵdarlamasına muwapıq, Evropa Awqamınıń paytaxtında usı awqamnıń tiykarǵı institutlarınıń basshıları menen eki tárepleme sóylesiwler ótkeriliwi rejelestirilgen.
Sonday-aq, sapar sheńberinde Ózbekstan jetekshisi Belgiya basshıları menen ushırasıw ótkeredi, texnologiyalıq hám sanaat kooperaciyasın rawajlandırıw boyınsha birgeliktegi rejelerdi jedellestiriw maqsetinde Evropanıń jetekshi kompaniya hám bankleriniń basshıların qabıllaydı.
ÓzAnıń xabarshısı usı tariyxıy sapar aldınan Ózbekstan hám EA qatnasıqları, birge islesiwdiń házirgi basqıshı hám perspektivaları haqqında TMShU Analitikalıq izertlewler orayınıń direktorı, siyasiy ilimler doktorı, professor Sayfiddin Jwraevtıń pikirlerin jazıp aldı.
– Bárinen burın, Prezidentimizdiń Bryusselge rásmiy saparı dawamında Ózbekstan hám Evropa Awqamı arasında Keńeytilgen sheriklik hám birge islesiw haqqındaǵı kelisimge (EPCA)qol qoyılıwı kútilmekte. Bul elimizde 2017-jıldan baslap alıp barılǵan sistemalı ózgerislerdiń nátiyjesiniń ayqın kórinisi bolıp, óz gezeginde, bul kelisim reformalardı keńeytiw hám tereńlestiriw dawamlılıǵın támiyinlew, ekonomikanı modernizaciyalaw hám globallıq birge islesiw jańa mazmun menen bayıp atırǵanınan dárek beredi. Bul processtiń eki tárepine itibar qaratpaqshıman.
Birinshiden, sırtqı hám qáwipsizlik siyasatı tarawlarında ámeliy birge islesiwdi jańa dáwir talaplarına say tárizde keńeytiw – regionallıq hám xalıqaralıq birge islesiw qarım-qatnaslar platformasın jaratıwǵa alıp keledi. Bul baǵdarda, jańa Oraylıq Aziya, sonıń ishinde, Ózbekstan menen ámeliy siyasiy qatnasıqlardıń jańa dáwir talapları hám nızamlılıqları menen úylesip baratırǵanlıǵı, bul baǵdardaǵı ózgerislerde ulıwmainsanıylıq hám demokratiyalıq qádiriyatlar, mámleketshiliktiń rawajlanıwı hám reformalardı ámelge asırıwda nızamnıń ústinligi óz nátiyjelerin berip atırǵanlıǵı menen ajıralıp turadı.
Sonday-aq, Oraylıq Aziyada turaqlı rawajlanıwdı támiyinlew hám xalıqaralıq kólemde birge islesiwdiń jańa qırların izlep tabıw, insaniyatqa zıyan keltirip atırǵan ǵalabalıq qırǵın, ásirese, yadro qurallarınıń tarqalıwına jol qoymaw, házirgi hám jańadan payda bolıwı múmkin bolǵan hár qıylı kelispewshiliklerdiń aldın alıw, sırtqı siyasat hám qáwipsizlikti támiyinlew boyınsha ashıq, konstruktivlik sóylesiwler alıp barıw birge islesiwdi keńeytiwge alıp keledi.
Hár eki tárepte ádillik hám qáwipsizlikti támiyinlew boyınsha shólkemlestiriwshilik-huqıqıy mexanizmlerdi qorǵaw, migraciya, jınayıy dáramatlardı legallastırıw hám terrorizm, shólkemlesken jınayatshılıq hám korrupciyaǵa qarsı gúresiw, nızamsız náshebentlik zatlarǵa qarsı gúresiw, sonday-aq, sud isleri hám konsullıq qorǵaw boyınsha baylanıslardıń turaqlı hám paydalı bolıwın támiyinlewge jańa sharayatlar jaratadı.
Ekinshiden, EPCA kelisiminiń úlkemiz hám Evropa Awqamı arasındaǵı qatnasıqlarda jańa imkaniyat hám sharayatlardı júzege keltirip, óz-ara birge islesiwdiń jańa dáwirin baslap beredi, dep aytıw múmkin. Kútilip atırǵan bunday birge islesiw, nátiyjede, Oraylıq Aziyanıń, sonıń ishinde, Ózbekstannıń strategiyalıq abırayın arttırıwǵa, ekonomikalıq qúdiretin kóteriwge, puqaralarımızdıń abadanlıǵın támiyinlewge ámeliy járdem beredi.

Wtkir Alimov,
ÓzAnıń xabarshısı