Múnásibet

Prezidentimiz Sh.Mirziyoevtiń AQShqa rásmiy saparı mámleketimizdiń sırtqı siyasatı hám ekonomikalıq reformaları jolında áhmiyetli qádem sıpatında tariyxta qalatuǵını sózsiz. Sonıń menen birge tek ǵana eki mámleket arasındaǵı birge islesiwdi bekkemlep qoymastan, Ózbekstannıń xalıqaralıq maydandaǵı abırayın arttırıw, ekonomikalıq turaqlılıq hám strategiyalıq maqsetlerge erisiw jolında jańa imkaniyatlardı ashtı.
Sapar sheńberinde AQShtıń iri qarjı institutları hám korporaciyaları menen bir qatar shártnamalarǵa qol qoyıldı. Bul kelisimler mámleketimizge milliardlap dollarlıq investiciyalardı tartıwǵa tiykar jaratadı. Sonıń ishinde, energetika, transport, awıl xojalıǵı, sanlı ekonomika hám sanaat tarawlarında iri joybarlardıń ámelge asırılıwı rejelestirilgen. Bul óz gezeginde, óndiris kólemin arttırıw, jańa jumıs orınların jaratıw hám eksport potencialın keńeytiwge xızmet etedi.
Zamanagóy texnologiyalardı Ózbekstanǵa tartıw sapardıń tiykarǵı baǵdarlarınan biri boldı. AQShtıń innovaciyalıq kompaniyaları menen birge islesiw jergilikli óndiristi modernizaciyalaw, joqarı qosımsha qunlı ónimler islep shıǵarıw hám ekonomikanıń básekige shıdamlılıǵın arttırıw imkaniyatın beriwi kútilmekte. Bul “Ózbekstan – 2030” strategiyasında belgilengen maqsetlerge tolıq sáykes keledi.
Prezidentimiz ushırasıwlar dawamında bilimlendiriw hám insan kapitalı máselesine ayrıqsha itibar qaratıp, AQShtıń abıraylı universitetleri, ilimiy orayları menen birge islesiw baǵdarlamaları islep shıǵıldı. Oǵan bola, jaslarımızdı zamanagóy bilim hám kónlikpelerge iye qánige sıpatında tayarlaw, ilimiy izleniwlerdi, tájiriybe almasıwdı kúsheytiw názerde tutılmaqta.
AQSh penen birgelikte qayta tiklenetuǵın energiya dereklerinen nátiyjeli paydalanıwǵa qaratılǵan joybarlardıń ámelge asırılatuǵını belgilendi. Quyash hám samal energiyası tarawındaǵı baslamalar tek ǵana energetikalıq biyǵárezlikti támiyinlep qoymastan, al ekologiya hám turaqlı rawajlanıw ushın da úlken áhmiyetke iye.
Prezident Sh.Mirziyoevtiń AQShqa saparı Ózbekstannıń xalıqaralıq maydandaǵı jańa imidjin ayqın kórsetti. Qol qoyılǵan kelisimler hám belgilengen baslamalar elimizdiń ekonomikalıq jaqtan ósiwi, investiciyalıq ortalıqtı jaqsılaw, jańa texnologiyalardı tartıw hám insan kapitalın rawajlandırıwda sheshiwshi áhmiyetke iye.
Bul sapar tek ǵana eki mámleket qatnasıqların jańa basqıshqa alıp shıqqanı emes, al Ózbekstannıń kelesi jıllardaǵı tiykarǵı makroekonomikalıq kórsetkishlerin támiyinlew, xalqımızdıń turmıs dárejesin arttırıw hám “Ózbekstan – 2030” strategiyasında belgilengen maqsetlerge erisiw jolında úlken qádem bolıp xızmet etetuǵını anıq.

Ruslan Djumamuratov,
Oliy Majlis Nızamshılıq palatası deputatı.
Qaraqalpaqstan xabar agentligi