Sidney qalasında bolıp ótken Xalıqaralıq astronavtika kongresi sheńberindegi “IAC Hosts Summit”tiń 12-májilisinde 60 tan aslam mámleket hám xalıqaralıq shólkemlerdiń wákilleri qatnastı. Májiliste kosmos tarawında iri ilajlardı nátiyjeli shólkemlestiriw hám xalıqaralıq birge islesiwdi rawajlandırıw máseleleri dodalandı.

Sammit baǵdarlaması sheńberinde bir qatar áhmiyetli sessiyalar shólkemlestirildi. Sonıń ishinde, “Sponsorship: The Backbone of a Successful IAC” temasındaǵı panelde SWF, CNES, Azercosmos, SIAA hám AIDAA wákilleri óz tájiriybeleri menen ortaqlasıp, iri xalıqaralıq ilajlardı finanslıq jaqtan qollap-quwatlawda nátiyjeli baǵdarlardı dodaladı.
Sonday-aq, “Ready to Take Off: Pitching Your IAC Vision for 2028” atamasında Baxreyn, Hindstan hám Ózbekstan delegaciyaları óz usınısları hám koncepciyaları menen qatnastı. Ózbekstan Respublikası atınan “O‘zbekkosmos” agentligi prezentaciya ótkerdi. Agentlik direktorınıń orınbasarı Muhiddin Ibragimov video hám multimedia prezentaciyası arqalı 2028-jıldaǵı Xalıqaralıq astronavtika kongresin Samarqand qalasında ótkeriw koncepciyasın usındı.
Prezentaciyada Samarqandtıń tariyxıy-mádeniy miyrası hám zamanagóy infrastrukturalıq imkaniyatları, mámlekettiń kosmos tarawındaǵı tiykarǵı maqset hám baslamaları haqqında tolıq maǵlıwmat berildi. Sonday-aq, Ózbekstan húkimetiniń iri xalıqaralıq ilajlardı nátiyjeli shólkemlestiriwdegi tájiriybesi haqqında sóz etilip, mámlekettiń xalıqaralıq birge islesiwge ashıq ekenligi atap ótildi.
“Hosting the IAC as a Bridge for Unity” temasındaǵı xalıqaralıq panel sessiyasında bolsa Túrkiya, Italiya, Avstraliya, AQSh hám Polsha wákilleri qatnasıp, IACtıń global awızbirshilik, ilim hám innovaciyalardı rawajlandırıwdaǵı áhmiyeti haqqında pikir alıstı.

Nigora Rahmonova, ÓzA