Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonında xalıqtıń turmıs abadanlıǵın arttırıw baǵdarında ámelge asırılıp atırǵan jumıslar boyınsha úyreniw jumısların alıp bardı.

Dáslep Beshtom máhállesi aymaǵındaǵı «Amu karavan hotel» JShJ tárepinen shólkemlestirilgen miymanxana xızmeti joybarı kórip shıǵılıp, respublikamız basıshısına aldaǵı rejeler tanıstırıldı.
Bunnan soń CHoykwl APJ aymaǵındaǵı «CHoykwl Dwstlik» fermer xojalıǵı atız maydanında Qıtay mámleketinen alıp kelingen paxta teriw mashinasınıń jumıs procesi, jańa texnikanıń imkaniyatları kózden ótkerildi.
Sonday-aq, respublikamız Basshısı «Bekman Allaberganov» fermer xojalıǵınıń egislik maydanındaǵı terimshilerdiń jaǵdayınan da xabar alıp, olarǵa harmasın ayttı hám aldınǵı terimshilerge sawǵalar tapsırdı.
Sońınan Aybek máhállesindegi «Oybek mebel» JShJ tárepinen jolǵa qoyılǵan mebel islep shıǵarıw joybarı, «Yoqubboy Ashirov» fermer xojalıǵı tárepinen Qıtay texnologiyası tiykarında iske túsirilgen paxta, ǵálle hám basqa da dánli egin tuqımların qayta islew joybarı menen tanısıp, isbilermenlerdiń jumısın qollap-quwatlaw, olarǵa jaqınnan járdem beriw boyınsha juwapkerlerge anıq tapsırmalardı berdi.
Sonday-aq, Dwrmon awıl puqaralar jıyını aymaǵında «Sayxunabad tájiriybesi» tiykarında bir kontur-bir ónim ólshemi menen jańadan shólkemlestirilgen ıssıxanalardıń jumısı da kózden ótkerildi.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonında ámelge asırılıp atırǵan jumıslardı kózden ótkeriw barısında, Qıtay mámleketinen kelgen investorlardıń shólkemlestiriwindegi «EverPROSPER INVESTMENT CONSULTING» JShJ tárepinen «Jańa Ózbekstan» massivi aymaǵında 600 kvartiralı kóp qabatlı turaq jaylardı qurıw joybarına start berdi.
Úyreniwlerden soń rayon hákimliginde Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń basshılıǵında Ámiwdárya rayonın sociallıq-ekonomikalıq jaqtan rawajlandırıw, xalıqtıń bántligin támiyinlew, mámleketlik baǵdarlamalar sheńberindegi belgilengen wazıypalar, ámelge asırılıwı tiyis ilajlardıń hám aldın berilgen tapsırmalardıń orınlanıwına arnalǵan májilis ótkerildi.
Oǵan respublikamızdıń mákeme, shólkem hám tiyisli ministrlikler, rayon juwapkerleri, máhálle belsendileri qatnastı.
Májiliste dáslep, aldınǵı májilis dáwirinde belgilep berilgen tapsırmalardıń búgingi kúnde orınlanıwı, máhállelerdi abat etiw, infrastruktura menen baylanıslı mashqalalardı sheshiw, mámleketlik baǵdarlamalar sheńberinde joybarlardıń ámelge asırılıwı, jańa kárxanalardıń jumısların shólkemlestiriw, qayta tikleniwshi energiya dereklerin keńnen en jaydırıw, kámbaǵallıqtı qısqartıw, puqaralardıń turmıs dárejesin jaqsılaw barısında wazıypalardıń orınlanıwı máseleleri sın kóz-qarasta kórip shıǵıldı.
Sonıń menen birge, puqaralardıń qosımsha dáramat alıwına járdem beriw, jaslardıń bántligin támiyinlew, isbilermenlikti rawajlandırıw, kárxanalar jumıslarına jaqınnan járdem beriw, bank xızmetlerin hám bazar infrastrukturasın jaqsılaw boyınsha da tapsırmalardıń orınlanıwı máseleleri de talqılandı.
Májiliste bul jumıslardı ámelge asırıwda ayırım juwapkerlerdiń óz wazıypasına nemquraydılıq penen qarap atırǵanı sınǵa alınıp, kemshilikler atap ótildi. Sonıń menen birge, óz wazıypasın atqarıwda qáte-kemshiliklerge jol qoyǵan ayırım juwapkerlerge intizamiy jaza-sharasın qollanıw, zárúr bolsa, lawazımına ılayıqlıǵı máselesin kórip shıǵıw boyınsha tapsırmalar berildi.

Qaraqalpaqstan xabar agentligi