Oliy Majlis Senatına BMSh Bas xatkeriniń arnawlı wákili, BMShtıń Oraylıq Aziya ushın Preventiv diplomatiya boyınsha regionallıq orayınıń basshısı Kaxa Imnadze keldi.

Senat Baslıǵı Tanzila Norboeva menen ushırasıwda Ózbekstannıń BMSh hám onıń strukturaları menen birge islesiwi, regionda tınıshlıq, qáwipsizlik hám turaqlı rawajlanıwdı támiyinlew baǵdarındaǵı birgeliktegi háreketler dodalandı.
BMShtıń Preventiv diplomatiya boyınsha regionallıq orayı menen óz-ara birge islesiwdiń rawajlanıp atırǵanı ayrıqsha atap ótildi. Transshegaralıq resurslardan aqılǵa uǵras paydalanıw, hayal-qızlar hám jaslardıń tınıshlıq processlerinde belsene qatnasıwı sıyaqlı baǵdarlar sheńberindegi joybarlar dodalandı.
Ushırasıwda 2025-jıl oktyabr ayında Ferǵana qalasında ótkeriliwi rejelestirilip atırǵan birinshi Ferǵana tınıshlıq forumına tayarlıq kóriw máselelerine itibar qaratıldı.
Ózbekstan basshılıǵında bolıp ótetuǵın Oraylıq Aziya mámleketleri basshılarınıń 7-Másláhát ushırasıwı sheńberindegi tiykarǵı baǵdarlar dodalandı.
2026-jılı ótkeriliwi rejelestirilgen Jas parlament aǵzalarınıń 12-global konferenciyası boyınsha da pikir alısıldı.
Ushırasıwda gender teńlikti támiyinlew, BMSh hayal-qızlar shólkeminiń wákilxanasın ashıw, hayal-qızlardıń huqıqların bekkemlew hám jaslardıń potencialın arttırıw baǵdarındaǵı baslamalar haqqında da pikir júrgizildi.

Norgul Abduraimova,
ÓzAnıń xabarshısı