Qaraqalpaqstan Respublikası Joqarǵı Keńesiniń Baslıǵı Amanbay Orınbaev Tórtkúl rayonındaǵı bir qatar sociallıq obektler, sonday-aq, isbilermenlerdiń jumısları menen jaqınnan tanıstı.

Respublikamız basshısı eń dáslep Yangihayot mákan puqaralar jıyını aymaǵındaǵı «Lochin chorva kompleksi» fermer xojalıǵınıń júzimgershilikti rawajlandırıw, Bahor MPJda jasawshı Atajan Urazimbetovtiń ıssıxanasında banan jetistiriw boyınsha jumısların kózden ótkerdi.
Ushırasıwda egislik maydanın mol dáramat deregine aylandırıp, jaqsı nátiyje kórsetip atırǵan bunday miynetkesh insanlardıń jumısları kópshilikke úlgi bolıwı kerek ekenligi atap ótildi.
Bunnan soń Yashnaobod MPJdaǵı 44-sanlı mektepte oqıwshılardıń sabaqtan tıs waqıtların nátiyjeli shólkemlestiriw boyınsha jolǵa qoyılǵan jumıslar úyrenilip, respublikamızdaǵı mekteplerde de kestedegi sabaqlar menen birge kásip-ónerge de baǵdarlaw isleri bolıwı kerek ekenligi ayrıqsha tilge alındı.
Sońınan Ziyokor elatında Prezidentimizdiń tapsırması menen qáwenderlik esabınan jańadan qurılıp atırǵan, 660 orınǵa mólsherlengen jańa mektep, Shodlik MPJda jańadan qurılıp atırǵan «Atajan Xudayshukurov» atındaǵı amfiteatr, «EVRO-AZIA» JShJ tárepinen jańadan qurılıp atırǵan 119 kvartiralı kóp qabatlı turaq jaylardıń qurılısı kózden ótkerilip, juwapkerlerge tiyisli tapsırmalar berdi.
Bunnan keyin «Twrtkwl shisha idishlari» JShJ hám Nurata APJdaǵı «Dunyo med stroy» JShJǵa qaraslı jańadan iske túsiriliw aldında turǵan klinikada bolıp, isbilermenlerdiń jumısın qollap-quwatlaw hám biznesin rawajlandırıwı ushın jaqınnan járdem beriw boyınsha juwapkerlerge anıq kórsetpeler berdi.
Úyreniwler sońında Qaraqalpaqstan Respublikası Joqarǵı Keńesiniń Baslıǵı Amanbay Orınbaev tárepinen Tórtkúl rayonın sociallıq-ekonomikalıq jaqtan rawajlandırıw boyınsha májilis ótkerildi.
Májiliske tiyisli mákeme-shólkem basshıları hám aymaq belsendileri qatnastı.
Onda rayondı sociallıq-ekonomikalıq jaqtan rawajlandırıw, kámbaǵallıqtı qısqartıw, xalıqtıń bántligin támiyinlew hám investiciyalıq joybarlardı ámelge asırıw baǵdarındaǵı berilgen tapsırmalar boyınsha ilajlar baǵdarlaması, sonday-aq, bunnan aldınǵı májiliste juwapkerlergi berilgen tapsırmalardıń orınlanıwı máseleleri qarap shıǵıldı.
Rayondı hár tárepleme rawajlandırıw boyınsha arnawlı baǵdarlama tiykarında bir qatar wazıypalar belgilep berilgeni menen, ayırım orınlarda bar múmkinshilikler tolıq iske qosılmay atırǵanlıǵın atap ótiw orınlı.
Atap aytqanda, máhállelerdegi jumıslardıń ámelde orınlanıwı, abadanlastırıw, pukaralardıń bántligin támiyinlew baǵdarında ilajlardıń talap dárejesinde emesligi sınǵa alınıp, juwapkerler eskertilip, ayırımlarına intizamiy jaza sharasın qollanıw boyınsha tapsırmalar berildi.
Ótkerilgen májilis dawamında tez waqıt ishinde isleniwi tiyis wazıypalar belgilenip, anıq tapsırmalar berildi hám óz jumısın orınlawǵa nemquraydılıq penen qarap atırǵan juwapkerlerge intizamiy jaza sharasın qollanıw, zárúr bolsa lawazımına ılayıqlıǵı máselesin kórip shıǵıw boyınsha tapsırmalar berildi.

Qaraqalpaqstan xabar agentligi