Ózbekstanda bilimlendiriw sistemasınıń barlıq baǵdarları, ásirese, mektepke shekemgi bilimlendiriw tarawında izbe-iz reformalar alıp barılmaqta. Bul baǵdardaǵı háreketler, bir jaǵınan, jas áwladtıń intellektuallıq hám sociallıq rawajlanıwın támiyinlewge xızmet etse, ekinshi jaǵınan jámiyette sapalı turmıs tárizin qáliplestiriwge tiykar jaratpaqta.

Xalıqaralıq tájiriybeler sonı kórsetedi, balanıń erte jaslarında alǵan bilimi onıń keyingi turmısı hám kásiplik jumısında sheshiwshi áhmiyetke iye. Sol sebepli, mektepke shekemgi bilimlendiriwge investiciya kirgiziw tek ǵana bilimlendiriwge emes, al mámlekettiń keleshegine qaratılǵan uzaq múddetli strategiyalıq qarar bolıp esaplanadı.
Milliy statistika komitetiniń maǵlıwmatlarına bola, 2024-jılı mámleket boylap mektepke shekemgi bilimlendiriw shólkemlerinde 33 mıń 705 jańa qosımsha orın paydalanıwǵa tapsırılǵan.
Bul kórsetkish 2023-jılǵa salıstırǵanda 16,5 procentke artqan bolıp, sistemada basqıshpa-basqısh ámelge asırılıp atırǵan keń kólemli reformalardıń nátiyjesin ayqın kórsetpekte. Qalaberdi, jaratılǵan qosımsha orınnıń 10 mıń 410 ı qalalarda, 23 mıń 295 i bolsa awıllıq jerlerde ekeni mektepke shekemgi bilimlendiriwdi aymaqlar boyınsha teń salmaqlı rawajlandırıwǵa bolǵan itibardı sáwlelendiredi.
Bul sanlardıń artında tek ǵana imaratlar sanınıń artqanı emes, al bilimlendiriwdiń sapası, pedagog kadrlardı tayarlaw, shańaraqlardıń bilimlendiriwge bolǵan isenimin bekkemlew sıyaqlı áhmiyetli faktorlar jatadı. Sebebi, mektepke shekemgi bilimlendiriw mákemeleriniń bar ekenligi olardıń sapalı jumıs alıp barıwın kepillemeydi. Tiykarǵı másele – bar imkaniyatlardan maksimal dárejede nátiyjeli paydalanıw, balalardıń individual talapların esapqa alǵan halda oqıw-tárbiya procesin shólkemlestiriw.

Dildora DWSMATOVA,
ÓzA