Dúnya shaxmat ıqlasbentleriniń itibarın Samarqandqa qaratqan “Grand Swiss-2025”tiń 5-turına Nodirbek Abdusattorov hám túrkiyalı Yagiz Kaan Erdogmush qarsılıǵındaǵı oyında burınǵı jáhán chempionı Rustam Qosimjonovtıń simvolikalıq dana qoyıwı menen start berildi.

Keshe ótkerilgen bul turda watanlasımız Nodirbek Abdusattorov aq danalarda háreket etken bolsa da, túrkiyalı jas shaxmatshıdan ústin kele almadı.
8 saattan kóbirek dawam etken bellesiwdiń 114-júriw jaǵdayında bir piyada ústinligine erisken Abdusattorovta jeńiw imkaniyatı bar edi. Biraq FIDE tariyxında tórtinshi eń jas grossmeyster ataǵına erisken 14 jasar túrkiyalı shaxmatshı hújimshi poziciyaǵa ótip alǵanı nátiyjesinde ushırasıw teńbe-teń juwmaqlandı.
Bul turda shaxmatshılarımızdan Javohir Sindorov hám Jahongir Vohidov er adamlar toparında oynap atırǵan 2 shaxmatshı hayal-qız – rossiyalı Aleksandra Goryachkina hám hindstanlı Divya Deshmuxni, Abdumalik Abdusalim ázerbayjanlı Muhammad Muradlını jeńdi.
Turnirde qatnasıp atırǵan shaxmatshılarımızdan Nodirbek Yoqubboev, Shamsiddin Vohidov, Muhiddin Madaminov, Muhammadzohid Suyarov qarsılasları menen teńbe-teńlikke eristi.
Hayal-qızlar arasındaǵı jarısta Guldona Karimova hám Madinabonu Xalilova qara danalarda, Gúlruxbegim Tohirjonova aq danalarda qarsılaslarınan ústinlikke eristi. Afruza Hamdamova hám Umida Omonova bolsa qarsılasları menen kelisiw jolın tańladı.
Búgin, 6-tur oyınları aldında iranlı Parham Magsudlu 4,5 ochko menen jeke jetekshilikti dawam ettirmekte. Iranlı shaxmatshı keshe ótken 5-tur ushırasıwında qara danalarda vengriyalı Richard Rapporttı jeńdi.
Bul turda jáhán chempionı Dommaraju Gukesh AQSh wákili Abhimanyu Mishraǵa jeńilgen jaǵdayda, turnirdiń birinshi sanlı qatnasıwshısı sıpatında klassifikaciyalanǵan Rameshbabu Praggnanandxa aq danalarda háreket etken germaniyalı Mattxias Bluebaumǵa táslim boldı.
6-tur oyınları aldınan Parham Magsudlu 4,5 ochko menen jetekshilik etip atırǵan jaǵdayda 4 qatnasıwshı 4 ochko menen keyingi orınlardı iyelep tur. 11 qatnasıwshınıń esabında 3,5 ball bar. Olardıń qatarında Nodirbek Abdusattorov hám Nodirbek Yoqubboev ta bar.
Búgin bolıp ótetuǵın 6-tur oyınlarında Nodirbek Abdusattorov qara danalarda ózi sıyaqlı 3,5 ochkoǵa iye izraillı Maksim Rodshteyn menen, Nodirbek Yoqubboev aq danalarda hindstanlı Pranav penen kúsh sınasadı.
Shaxmatshı qızlarımızdan Afruza Hamdamova qazaqstanlı Bibisora Asoubaeva menen, Guldona Karimova ukrainalı Mariya Muzichuk penen bellesedi.
Hayal-qızlar toparında ázerbayjanlı Uliya Fataliyeva, hindstanlı Vayshali Rameshbabu, rossiyalı Katerina Lagno, germaniyalı Dinara Vagner 4 ochko menen jetekshilik etpekte. Watanlaslarımızdan Afruza Hamdamova 3,5 ball menen qosımsha kórsetkishler boyınsha 10-orındı, Madinabonu Xalilova hám Guldona Karimova 3 ball menen 56 qatnasıwshı arasında 13-15-orınlardı iyelep tur.
Jarıslar 15-sentyabrge shekem dawam etedi.

Twlqin Rwziev, ÓzA