MǴKAda Ayrıqsha jaǵdaylar ministrligi tárepinen gúzgi-qısqı máwsimge tayarlıq processlerine baǵıshlanǵan brifing bolıp ótti. Onda ministrliktiń málimleme xızmeti baslıǵınıń orınbasarı Samandar Hikmatullaev tarawda alıp barılıp atırǵan jumıslar haqqında maǵlıwmat berdi.

Atap ótilgenindey, gúzgi-qısqı máwsimde turaq jay fondı, sociallıq taraw hám mámleket qaramaǵındaǵı jáne túnde adamlar qalatuǵın obektlerdi ısıtıwda tábiyǵıy hám suyıltırılǵan gaz, qattı janılǵı yamasa neft ónimlerinen paydalanıwda qáwipsizlik qaǵıydalarına ámel etpew jaǵdayları kóp ushırasadı.
Aqıbetinde insanlardıń záhárli gaz iyisinen záhárleniwi, adamlardıń ómiri hám densawlıǵına qáwip tuwdıratuǵın hawa-gaz aralaspasınıń jarılıwı hám órtler menen baylanıslı baxıtsız hádiyseler júz beriwi múmkin.
Bul baǵdarda Ayrıqsha jaǵdaylar ministrligi tárepinen hár jılı gúzgi-qısqı máwsim baslanıwınan aldın hám máwsim dawamında ekonomika tarmaqları, sociallıq taraw obektleri hám kóp kvartiralı turaq jay fondında ayrıqsha jaǵdaylardıń aldın alıw hám órt qáwipsizligin támiyinlewge qaratılǵan sistemalı profilaktikalıq-eskertiw ilajları ámelge asırılıp kelinbekte.
Máwsimdi zıyansız ótkeriw hám xalıq arasında keń kólemli profilaktikalıq ilajlardı shólkemlestiriw maqsetinde respublikamızda 552 jumısshı toparlar shólkemlestirilip, olarǵa tiyisli uyımlardan jámi 2 mıń 829 xızmetker tartılǵan.
“Hududgaztaminot” AJ, “Aymaqlıq elektr tarmaqları” AJ hám pech morıların tazalaw jumısların orınlawshı shólkemlerdiń qánigelerinen ibarat 703 ońlaw-tiklew xızmetleri de shólkemlestirilgen.
Jumısshı toparlar tárepinen orınlardaǵı bar 864 Basqarıw-servis kompaniyaları hám jeke menshik turaq jay múlk iyeleri shirketleriniń 554 inde, 9 mıń 452 máhálleniń 4 mıń 576 sında úyreniwler ótkerilip, 1 million 408 mıń 731 kóp kvartiralı turaq jaydan 220 mıń 121 i tekserilip shıǵıldı.
Bunnan tısqarı, xalıqtıń turaq jaylarınan 550 mıń 153 hám dala háwlilerinen 3 mıń 39 tekseriwden ótkerildi. Processler dawamında 93 mıń 227 kemshilik anıqlanıp, olardıń 82 mıń 502 si ornında saplastırıldı.
Sonday-aq, sociallıq taraw obektlerine ayrıqsha itibar qaratılıp, 23 mıń 110 obektten 10 mıń 34 iniń máwsimge tayarlıǵı boyınsha órt qáwipsizligin támiyinlew baǵdarında tekseriwden ótkerildi.
Orınlardaǵı túngi adamlar qalatuǵın orınlarǵa ayrıqsha itibar qaratılıp, “Mehribanlıq úyleri”, “Múriwbet” hám “Saqawat” úylerinde ayrıqsha jaǵdaylar bólimleri xızmetkerleriniń túngi náwbetshiligi jolǵa qoyıldı hám hár bir emlew stacionarlarında túngi tekseriwler ótkeriliwi engizildi.
Órt qáwipsizligi qaǵıydaları talapların úgit-násiyatlaw, puqaralardıń bilim hám kónlikpelerin arttırıw maqsetinde 117 mıń 427 márte puqaralar menen ushırasıw hám májilisler ótkerildi.
Búgingi kúnge shekem órt-qutqarıw bólimleriniń jeke quramı tárepinen máhálle belsendileri menen birgelikte úyme-úy aralaw dáwirinde 1 million 198 mıń 66 shańaraqta jasaytuǵın puqaralar menen túsindiriw jumısları ótkerildi.
Tallawlar sonı kórsetpekte, baxıtsız hádiyseler kópshilik jaǵdaylarda tábiyǵıy gaz hám alternativ janılǵı túrlerin jáne ısıtıw pechlerin paydalanıwda “gazden paydalanıw”, “texnikalıq hám órt qáwipsizligi” qaǵıydalarına ámel etilmegenligi, gaz tarmaǵına nadurıs jalǵanıw, úylerde ashıq ottan paydalanıwda itibarsızlıq hám orılardıń nasazlıǵı aqıbetinde kelip shıqpaqta.
Sırtqı qorǵaw qabıqları zıyanlangan elektr sım hám kabellerden paydalanıw qadaǵan etiledi. Ísıtıw máwsimi baslanıwınan aldın, ısıtıw pechleriniń morıların tazalaw, sazlaw hám olardı qaǵıyda talapları tiykarında ornatıw boyınsha xızmet kórsetiwshi arnawlı shólkemlerge múrájat etiw kerek.
Jaramsız, qoldan islengen ısıtıw úskenelerinen paydalanıw múmkin emes hám standart talaplarǵa juwap beretuǵın ısıtıw úskenelerinen paydalanıwda olardı islep shıǵarǵan kárxananıń instrukciyası menen tanısıp shıǵıw kerek.
Sonday-aq, ısıtıw pechlerin hádden tıs qızdırmaw, gaz hám elektr úskenelerin qadaǵalawdı jas balalarǵa tapsırmaw, gaz úskenelerin jalǵaw boyınsha tártip-qaǵıydalarǵa ámel etiw, janıwshı materiallardı gaz plitaları ústinde keptirmew jáne gaz ısıtıw úskenelerinen qáwipsizlik avtomatları arqalı paydalanıw kerek.

Gulnoza Boboeva, ÓzA