Búgin respublikamızdıń mádeniy turmısında umıtılmas tariyxıy sáne. Sebebi, 5-sentyabr kúni Berdaq atındaǵı Qaraqalpaq mámleketlik akademiyalıq muzıkalı teatrı óziniń 100-máwsimin saltanatlı túrde ashtı.

Bir ásirlik bay tariyxqa iye saxna – bul kórkem ónerdiń ruwxı, xalıq qálbiniń jańǵırıǵı, mıńlaǵan tamashagóyler qálbinde óshpes iz qaldırǵan muqaddes dárgay esaplanadı.
Ilaj kóterińki ruwxta, qızǵın hám jaqsı tilekler menen baslandı. Onda usı teatrdıń direktorı P.Mamutov shıǵıp sóylep, júz jıl ishinde teatrdıń basıp ótken dańqlı jolı, onıń kórkem óner rawajlanıwındaǵı ornı hám búgingi áwladqa qaldırǵan biybaha miyrası haqqında aytıp ótti. Sonday-aq, teatrdı keń jámiyetshilikke tanıtıwda óz dóretiwshiligi menen qatnasqan pidayı kórkem óner sheberleriniń mashaqatlı miynetin hám kásipke sadıqlıǵın húrmet penen tilge aldı.
Ashılıw máresiminde tek ǵana teatr basshıları emes, al saxnanıń haqıyqıy pidayıları – ustaz aktyor hám aktrisalar da shıǵıp sóyledi. Olar ózleriniń eske túsiriwleri, teatr saxnasında ótken ómir jolları, dáslepki rolleri, ustaz-shákirt dástúrleri haqqında keń túrde sóz etip, olardıń hár bir sózinde saxnaǵa, kórkem ónerge, tamashagóyge bolǵan sheksiz muhabbat, maqtanısh sezildi.
Ilaj dawamında jıllar dawamında teatrda jemisli miynet etken pidayı kórkem óner sheberlerine Minnetdarshılıq xatları hám estelik sawǵaları tapsırıldı. Bul tek ǵana tán alıw emes, al jańa áwlad ushın ruwxıy kópir, ullı kórkem óner mektebine sadıqlıq belgisi boldı.
Saltanatlı ashılıwdan soń teatr saxnasında Ózbekstan hám Qaraqalpaqstan kórkem óner ǵayratkeri, Berdaq atındaǵı mámleketlik sıylıqtıń laureatı Q.Zaretdinovtıń «Nazlımxan sulıw» baleti tamashagóyler itibarına usınıldı. Balettiń gózzal saxnalastırılıwı, názik ayaq oyınlar hám muzıkanıń ırǵaqları menen úylesken saxnalıq kórinisler miymanlarda úlken tásir qaldırdı.
Ásirlik tariyxqa iye bolǵan teatrdıń búgingi jaǵdayı – bul pidayılıq, sheberlik hám sadıqlıq penen bezelgen ruwxıy miynettiń jemisi bolıp esaplanadı. Solay etip, «aqsaqal» teatrımız óziniń jańa máwsimine úlken dóretiwshilik rejeler, jańa saxnalıq shıǵarmalar hám sadıq tamashagóyler menen birge isenimli qádem qoymaqta.

Adilbay Orazov,
Qaraqalpaqstan xabar agentligi sholıwshısı.